Prava zabudovy byłoha Červienskaha rynku pradali na aŭkcyjonie
Na adkrytym aŭkcyjonie 17 kastryčnika pradadziena prava zabudovy ŭčastka byłoha Červieńskaha rynku ŭ Minsku, paviedamili ŭ Minskim haradskim centry nieruchomaści.
Jak paviedamlałasia, na adkryty aŭkcyjon na prava prajektavańnia i budaŭnictva kapitalnych budynkaŭ byŭ vystaŭleny ŭčastak na miescy byłoha Červieńskaha rynku (skryžavańnie vulic Majakoŭskaha i Aranskaj) płoščaj 2,45 hiektara. Zhodna z umovami na ŭčastku, jaki zdajecca ŭ arendu na piać hadoŭ, pavinien być pabudavany šmatfunkcyjanalny kompleks.
Pačatkovy košt skłaŭ 1.314.881,56 denaminavanaha rubla (kala 657.440 dołaraŭ). Abciažarańniem źjaŭlajecca znos haražoŭ pa vulicy Aranžarejnaj i handlovaha paviljona na vulicy Aranskaj.
«Prava na zabudovu pradadziena adzinamu ŭdzielniku aŭkcyjonu, rezidentu Biełarusi, pa canie na 5% bolšaj za pačatkovy košt», — paviedamiła supracoŭnica centra nieruchomaści.
Raniej Minharvykankam skasavaŭ inviestycyjny dahavor ź iranskaj kampanijaj «Dzidas», jakaja tak i nie pačała zabudovu terytoryi byłoha Červieńskaha rynku. Pa ŭmovach inviestdahavora, budaŭnictva šmatfunkcyjanalnaha kompleksu ŭ rajonie pierasiačeńnia vulic Majakoŭskaha i Aranskaj, na miescy byłoha Červieńskaha rynku, pavinna było zaviaršycca ŭ 2015 hodzie, adnak jano navat nie pačałosia.
Zakryćcio Červieńskaha rynku ŭ 2013 hodzie vyklikała niezadavolenaść pradprymalnikaŭ, jakija tam handlavali. Rynak byŭ pieraniesieny ŭ mikrarajon Łošyca. Jaho pieranos za ŭłasnyja srodki ažyćciavili Respublikanskaja kanfiederacyja pradprymalnictva, Minski staličny sajuz pradprymalnikaŭ i rabotadaŭcaŭ i Biełaruski sajuz pradprymalnikaŭ.
