Apublikavanaje fota mierkavanaha zabojcy z «Jeŭropy»
Fota junaka, što zładziŭ raźniu ŭ «Jeŭropie», apublikavaŭ sajt rasijskaha telekanała Ren-TV. Jak vyhladaje, heta skrynšot sa słužbovaha videa, źniataha śledčymi.
Nahadajem, što ŭ subotu ŭ handlovym centry «Jeŭropa» ŭ centry Minska 17-hadovy chłopiec ź bienzapiłoj i siakieraj napaŭ na naviedvalnikaŭ. Adna žančyna była paranienaja, jašče adna zahinuła.
Jak stała viadoma, chłopca zvać Uład K., jon navučajecca ŭ Mižnarodnym univiersitecie «MITSO». Adnakurśniki kažuć, što jon byŭ adludny, ni z kim nie kamunikavaŭ i pieravažna prahulvaŭ zaniatki.
Śledčyja kažuć, što zatrymany tłumačyć svaje namiery ahidaj da ludziej i depresijaj. Jon chacieŭ učynić ludabojstva i kab jaho samoha zabili, kažuć śledčyja.
Pra jaho viadoma, što jon z zabiaśpiečanaj siamji, u jakoj, adnak, mama i tata nie žyvuć razam.
Baćka zatrymanaha žyŭ u Minsku asobna, maci i siastra — za miažoj. Pavodle źviestak papiaredniaha rasśledavańnia, małady čałaviek u 2014 hodzie prachodziŭ lačeńnie ŭ psichanieŭrałahičnym dyspansiery.
Zabojca, nahadajem, prynios siakieru ŭ futarale ad muzyčnaha instrumienta, a ŭ ruce trymaŭ bienzapiłu.
Z zaviedzienaj bienzapiłoj jon napaŭ na dźviuch rabotnic HC. Adna žančyna zahinuła, druhaja — ŭ balnicy.
Napadnik byŭ adzin. A čutki pra toje, što napadnikaŭ było niekalki, źviazanyja z tym, što čałavieka bačyli spačatku ź bienzapiłoj, potym ź siakieraj, rastłumačyli ŭ Śledčym kamitecie.
Mierkavanaja siakiera na miescy zdareńnia, fota Arcioma Harbaceviča
U 17:34 pastupiŭ pieršy zvanok u dziažurnuju častku HUUS,
u 17:35 prybyŭ pieršy narad.
U 17:38 napadnika zatrymaŭ 27-hadovy rabotnik handlovaha centra.
Nasupierak čutkam pieršych chvilin, paviedamlaŭ karespandent NN, hałava achviary nie była adrezanaja. Ale ŭsia padłoha vakoł cieła była zalitaja kryvioj.
Śledčy kamitet zavioŭ kryminalnuju spravu pa č.2 art.139 KK «Zabojstva».
