Zamarozka «Paŭnočnaha patoku — 2» moža ŭvajści ŭ novy pakiet sankcyj ES suprać Rasii
U Jeŭraparłamiencie paćvierdzili, što błakavańnie prajekta Nord Stream 2 moža ŭvajści ŭ novy pakiet sankcyj ES suprać Rasii. Pra heta zajaviŭ Piedra Łopies de Pabła, kiraŭnik pres-słužby jeŭradeputata Manfreda Vebiera.
Pavodle jaho słoŭ, Vebier, kiraŭnik frakcyi Jeŭrapiejskaj narodnaj partyi, vystupiŭ z hetaj prapanovaj na plenarnym pasiadžeńni Jeŭraparłamienta 5 kastryčnika. Tekst jaho vystupu na niamieckaj movie dastupny na aficyjnym sajcie.
«Jak vy viedajecie, Jeŭrapiejski parłamient abmiarkoŭvaje sankcyi Rasii ŭ ramkach ahulnych palityčnych dyskusij, — dadaŭ Łopies de Pabła. — Ale finalnaje rašeńnie pa sankcyjach budzie pryniataje tolki Radaj Jeŭrasajuza na ŭzroŭni kiraŭnikoŭ MZS».
Nord Stream 2, jon ža «Paŭnočny patok — 2», - prajekt hazapravoda, jaki dazvolić transpartavać haz z Rasii ŭ Hiermaniju pa dnie Bałtyjskaha mora ŭ abychod tranzitnych krain.
5 kastryčnika, kali Vebier vynies prapanovu ab zamarozcy prajekta, saviet dyrektaraŭ apieratara Nord Stream 2 uznačaliŭ Hierchard Šroder, były kancler Hiermanii.
Raniej paviedamlałasia, što FRH moža inicyjavać uzmacnieńnie jeŭrapiejskich sankcyj suprać Rasii z-za abvastreńnia situacyi ŭ Siryi. U Kramli zajavili, što nie čuli aficyjnych zajaŭ lidaraŭ zachodnich krain ab mahčymaści ŭviadzieńnia novych sankcyj suprać Rasii.
