Milicyjanty dziasiaty dzień šukajuć dvuch źnikłych padletkaŭ
Vierchniadźvinskija milicyjanty 10-y dzień šukajuć dvuch źnikłych padletkaŭ z ahraharadka Sarja, paviedamili ŭ pres-słužbie UUS Viciebskaha abłvykankama.
«Dvoje siabroŭ 15 i 16 hadoŭ, jakija nie adroźnivajucca prykładnymi pavodzinami, raniej znachodzilisia na ŭliku ŭ ISN, z 17 vieraśnia nie pakazvalisia doma. Baćki adnaho z chłopcaŭ, pieršakurśnika Połackaha dziaržaŭnaha prafliceja budaŭnikoŭ Paŭła Krotava, zabili tryvohu 26 vieraśnia. Siamja ź liku niaŭdałych: jany ličyli, što dzicia dzieści zahulała. Jon z samaha pačatku navučalnaha hoda nie pakazvaŭsia na zaniatkach. Milicyjanty prystupili i da vyšuku siabra Paŭła — Ivana Jankoŭskaha, dziesiacikłaśnika Sarjanskaj škoły. Chacia jaho baćka padaŭ zajavu tolki ŭčora», — rastłumačyŭ staršy opierupaŭnavažany pa asabliva važnych spravach upraŭleńnia kryminalnaha vyšuku UUS Ihar Malkoŭ.
Abodva padletki nie raz sychodzili z domu, ale nikoli na taki doŭhi termin. Pry sabie ŭ chłopcaŭ niama mabilnych telefonaŭ, nichto ź siabroŭ i znajomych ź imi nie źviazvaŭsia i nie bačyŭ z samaha dnia źniknieńnia.
Prykmiety Paŭła Krotava: rost 170 sm, chudarlavaha ciełaskładu, karotkija ciomna-rusyja vałasy, šeryja vočy. Z asablivych prykmiet - tatuiroŭka z abrevijaturaj A.S.A.V. na pieradpleččy levaj ruki. Byŭ apranuty ŭ kurtku šeraha koleru ź sierabrystymi ŭstaŭkami na rukavach, sinija džynsy, karyčnievyja krasoŭki.
Prykmiety Ivana Jankoŭskaha: rost 165 sm, chudarlavaha ciełaskładu, karotkija rusyja vałasy, šera-błakitnyja vočy. Asablivych prykmiet nie maje. Byŭ apranuty ŭ čornuju kurtku ź biełymi ŭstaŭkami, sinija džynsy z aranžavymi ŭstaŭkami, biełuju majku, abuty ŭ bieła-zialonyja krasoŭki. Pry sabie mieŭ ciomny zaplečnik.
Milicyja prosić usich, kamu što-niebudź viadoma pra miescaznachodžańnie chłopcaŭ abo pra abstaviny ich źniknieńnia, paviedamić u Vierchniadźvinski RAUS (pa telefonach 8 (02151) 5-32-84, 5-07-26 — adździaleńnie kryminalnaha vyšuku, 8 (02151) 5 -32-02, 514-11-85 (MTS), 310-39-02 (velcom) — dziažurnaja častka) albo pa telefonie 102.
