Dva zabojstvy, zhvałtavańnie, kradziež, chulihanstva, zhon… — rasijanin ździejśniŭ 12 złačynstvaŭ za sutki
Sud vynies prysud 37-hadovamu narkamanu Jarmieku Abdrachmanavu, žycharu rasijskaha Omska, jaki ŭ adzin letni dzień zastreliŭ niekalki mužčyn, zhvałciŭ dźviuch žančyn, abrabavaŭ dzicia i ździejśniŭ zhon.
Centralny rajonny sud Omska prysudziŭ 37-hadovaha žychara hetaha rasijskaha horada Jarmieka Abdrachmanava da 21 hoda kałonii strohaha režymu. Jak paviedamlaje śledčy kamitet pa Omskaj vobłaści, takoje surovaje pakarańnie jamu dali za sukupnaść asabliva ciažkich złačynstvaŭ. Za adny sutki Abdrachmanaŭ ździejśniŭ ažno 12 złačynstvaŭ: zabojstva, zamach na zabojstva dvuch asob, niezakonnaje nabyćcio i zachoŭvańnie ahniastrelnaj zbroi, rabavańnie, zhon aŭtamabila, zhvałtavańnie, razboj, paboi, pahroza zabojstvam i hvałtoŭnyja dziejańni seksualnaha charaktaru.
Usie złačynstvy adbylisia ŭ adny i tyja ž sutki — 26 žniŭnia 2015 hoda.
Jarmiek Abdrachmanaŭ, jaki niadaŭna vyzvaliŭsia z kałonii, zładziŭ z pryjacielami siabroŭskuju papojku ŭ pasiołku Kazickaha. Padvypiły 32-hadovy znajomy staŭ dakarać Abdrachmanava za narkamaniju. Razzłavany recydyvist streliŭ mužčynie ŭ hałavu sa svajho pistaleta z hłušycielem, pieraroblenym z hazavaha. Zatym Abdrachmanaŭ vyrašyŭ likvidavać śviedak. Jon zabiŭ strełam u hałavu svajho śpiačaha 29-hadovaha znajomaha i adpraviŭsia na bałkon zabivać jašče dvuch tavaryšaŭ. Ale mužčyny zmahli adabrać u recydyvista pistalet i vykinuć jaho z bałkona.
Abdrachmanaŭ vybieh z kvatery pa pistalet, ale nie znajšoŭ jaho. Sa złości jon źbiŭ padletka, jaki prachodziŭ mima, i adabraŭ u jaho telefon. Recydyvist nakiravaŭsia na rynak «Uschodni» i sahnaŭ tam aŭtamabil «Šeŭrale» z pasažyrkaj unutry. Ale nie spraviŭsia z kiravańniem i ŭrezaŭsia ŭ piłamateryjały.
Recydyvist kinuŭ mašynu i źjechaŭ na taksi ŭ hości da brata. Nie zaśpieŭšy jaho doma, Abdrachmanaŭ zhvałciŭ sužycielku brata i adabraŭ u jaje hrošy. Na ich mužčyna kupiŭ narkotyk.
U stanie narkatyčnaha apjanieńnia Abdrachmanaŭ staŭ nočču błukać pa pryvatnym siektary vulicy 19-j Pracoŭnaj i stukacca ŭ dźviery. Adna siamja pa nieaściarožnaści adkryła dźviery nieznajomcu. Abdrachmanaŭ, pahražajučy nažom, źbiŭ i źviazaŭ haspadara doma, a nad haspadyniaj ździejśniŭ hvałtoŭnyja dziejańni seksualnaha charaktaru.
Kali supracoŭniki śledčaha kamiteta zatrymali sieryjnaha złačynca, jon adrazu pryznaŭ svaju vinu.
