Adnoj z novych vulic Drahičyna mohuć nadać imia Niła Hileviča
30 vieraśnia narodnamu paetu spoŭniłasia b 85 hod.
lit-bel.org
U Drahičynie moža źjavicca vulica imia narodnaha paeta Niła Hileviča. Pra heta «Salidarnaści» paviedamiŭ hramadski aktyvist Siaržuk Bachun, jaki ŭ kancy červienia źviarnuŭsia z adpaviednaj prapanovaj da staršyni Drahičynskaha rajonnaha savietu deputataŭ Śviatłany Bartaš.
«Z 1985 pa 1990 h. Nił Symonavič Hilevič byŭ deputatam Viarchoŭnaha Savieta BSSR XI sklikańnia, u jakim pradstaŭlaŭ Drahičynski rajon. Źviartajusia da Vas z prośbaj ušanavać pamiać u Drahičynskim rajonie ab hetym sapraŭdy Narodnym čałavieku. Prapanuju nazvać vulicy imiem Niła Hileviča ŭ Drahičynie i ŭ rajonie. Taksama možna nadać imia Niła Hileviča adnoj ź biblijatek u Drahičynskim rajonie», — napisaŭ u zvarocie Siaržuk Bachun.
U adkazie Śviatłany Bartaš havorycca, što ŭ novym rajonie indyvidualnaj zabudovy Drahičyna na siońnia jość vosiem vulic, jakim płanujecca nadać nazvy.
«Adździeł ideałahičnaj raboty, kultury i pa spravach moładzi Drahičynskaha rajvykankama budzie chadajničać ab nadańni adnoj z vulic novaha mikrarajona h. Drahičyna imia Niła Hileviča. Vaš zvarot zastajecca na kantroli ŭ Drahičynskim rajonnym Saviecie deputataŭ», — havorycca ŭ adkazie Śviatłany Bartaš.
Taksama Siaržuk Bachun dasłaŭ u Łahojski rajonny Saviet deputataŭ prapanovu ab nadańni imia Hileviča adnoj z vulic u Łahojsku i rajonie, a taksama adnoj ź biblijatek na Łahojščynie.
Staršynia rajsavieta Piotr Vabiščevič paviedamiŭ aktyvistu, što jahonaja prapanova była razhledžana deputatami na čarhovaj siesii. Na joj było pryniata rašeńnie vynieści inicyjatyvu Bachuna na hramadskaje abmierkavańnie.
Nahadajem, što vulica imia narodnaha paeta moža źjavicca ŭ Minsku. Adpaviedny adkaz ź Minharvykankama ŭ pačatku krasavika atrymała hramadskaje abjadnańnie «Tavarystva biełaruskaj movy imia Franciška Skaryny».
