Arhanizatary raskryli padrabiaznaści padrychtoŭki da «Jeŭrabačańnia-2017» u Kijevie
U pasolstvie Ukrainy prajšła sustreča z pradstaŭnikami administracyj Kijeva, Lvova i Charkava, žurnalistami i turystyčnymi ahienctvami. U pryvatnaści, pradstaŭniki Ukrainy raspaviali pra novyja turystyčnyja kirunki, jakija płanujecca prezientavać padčas «Jeŭrabačańnia-2017», finału Lihi Čempijonaŭ i h.d.
Anton Taranienka, načalnik upraŭleńnia turyzmu Kijeŭskaj haradskoj dziaržaŭnaj administracyi, raspavioŭ, jak budzie prachodzić mižnarodny konkurs pieśni «Jeŭrabačańnie» u Kijevie:
«Jeŭrabačańnie ŭžo prachodziła ŭ Kijevie ŭ 2005 hodzie. Kali my kažam pra kantent, muzyčny składnik konkursu — heta na ŭzrovień vyšejšaje šou, čym u minuły raz. Jeŭrabačańnie ŭ Kijevie projdzie z 1 pa 15 maja. Paŭfinały adbuducca 9 i 11 maja, finał — 13 maja.
Konkurs projdzie na levym bierazie Kijeva ŭ Mižnarodnym vystavačnym centry. Taksama buduć dźvie łakacyi «Jeŭrakłab» — heta toje miesca, dzie buduć adpačyvać aficyjnyja delehacyi, žurnalisty, fanaty, i «Jeŭravioska» — tudy my zaprasili ŭsie harady Ukrainy, jakija stvorać svaje fan-zony. Kvitki ž na Jeŭrabačańnie buduć kaštavać ad 20—30 jeŭra».
Pry hetym Anton Taranienka adznačyŭ, što nie było nijakich matyvaŭ u tym, što mienavita Kijeŭ u druhi raz stanie miescam praviadzieńnia konkursu: «My zychodzili ź mierkavańnia, što ŭ siłu tych abstavin, jakija skłalisia na ŭschodzie Ukrainy, my majem peŭnyja finansavyja prablemy, bo vialikaja častka hrošaj idzie na ŭzbrajeńnie ŭkrainskaj armii. Niahledziačy na toje, što i pa hałasavańni Kijeŭ pieramoh, na praviadzieńnie Jeŭrabačańnia ŭ inšym horadzie spatrebiłasia b niejmavierna vialikaja kolkaść hrošaj, bo heta nie tolki kancertnaja placoŭka, a jašče i infrastruktura».
Što tyčacca prahramy konkursu, načalnik upraŭleńnia turyzmu adznačyŭ, što vystupy ŭkrainskich hurtoŭ buduć abaviazkova prysutničać padčas Jeŭrabačańnia. «Ale mnie b chaciełasia, kab «Akijan Elzy», «Bumboks» ci «Anuka» vystupili ŭ jakaści kankursantaŭ, ale takoje mahčyma, tolki kali jany pieramohuć u adboračnym tury».
Pry hetym dla zabaronienych da ŭjezdu va Ukrainu asob palityka zastajecca raniejšaj — pryjechać jany nie zmohuć.
«U Rasii šmat talenavitych śpievakoŭ i hurtoŭ, jaki pryjazdžajuć i spakojna pracujuć va Ukrainie. Voś mnie padabajecca rep-vykanaŭca Basta, jon navat moh by moža štości vyjhrać na konkursie. Kali kažuć, što Ukraina palityzuje Jeŭrabačańnie, to ŭ svaju čarhu chaču adznačyć, što horad Kijeŭ harantuje biaśpieku i zrobić maksimalna kamfortnyja ŭmovy dla ŭsich turystaŭ, kamand i śpievakoŭ niezaležna ad krainy. Treba zrazumieć pazicyju, što kali vy znachodziciesia ŭ čornych śpisach luboj krainy, to heta strohaje praviła paŭsiul».
