Były padvodnik ź Pinska złaviŭ sama vahoj 65 kh
Žychar Pinska Pavał Lachnovič złaviŭ hihanckaha sama.
Łoŭla takoj vialikaj rybiny dałasia ciažka. «Ciahaŭ jon mianie pa race chvilin sorak, — raskazaŭ «Našaj Nivie» były padvodnik.
— Kali ja zaŭvažyŭ hetaha sama, to zrazumieŭ, što jon prosta parvie moj harpun, — kaža Lachnovič. — Vyrašyli my ź siabram viarnucca i ŭziać štości macniejšaje. Padpłyŭ druhi raz na toje samaje miesca — jon mianie zaŭvažyŭ i pačaŭ varušycca. Adrenalin u hety momant prosta zaškalvaŭ. Ja davaj stralać, ale daŭ pudła, i som uciok.
Doŭha šukaŭ, vyłaziŭ na bierah adpačyć. U vyniku znoŭ znajšoŭ jaho, stralaju — trapiŭ. Ale jon staŭ raskručvać šnur, i ja paškadavaŭ, što nabyŭ nie kieŭłaravy, a kapronavy tanny. Nu i ŭsio, jon źnios mnie harpun, usio złamaŭ, zastaŭsia ja biez adnoj strelby. Toje samaje zdaryłasia i z druhoj strelbaj, kali ja jaho znoŭ znajšoŭ praz 30 chvilin. U vyniku pajechali da siabroŭ, pazyčyli ŭ ich jašče dźvie strelby, ale ŭžo z kieŭłaravymi šnurami.
Ranicaj viarnuŭsia na toje ž miesca, hladžu — lažyć u jamie hłybinioj dzieści 3—4 mietry. Stralaju i ŭrešcie dobra traplaju jamu ŭ hałavu. Jon doŭha mianie buksiravaŭ, paciahaŭ mietraŭ dźvieście pa race ŭniz, ale paśla stamiŭsia i viarnuŭsia ŭ tuju jamu la bierviana adpačyć. Ja pačaŭ pakrysie skručvać šnur i baču, što na chvaście ŭ jaho dva maje harpuny, pryčym z roznych bakoŭ. Jon pačynaje vykručvacca, sprabavaŭ mianie ŭchapić zubami, ale niejkim cudam ja zmoh daciahnuć jaho da bieraha», — apavioŭ Lachnovič.
Lachnoviču 62 hady. Byŭ jon za svajo žyćcio marakom padvodnaha i nadvodnaha fłotu, «vybivałam» u restaracyi, trenieram pa kikboksinhu, ciełaachoŭnikam, žurnalistam i navat budaŭnikom u Maskvie dy Varšavie.
A ŭ apošni čas pačaŭ jon pisać litaraturnyja tvory. Vydaŭ zborniki apaviadańniaŭ «Pačatak siezonu», «Zołata kniazioŭny», «Zialony dub». Drukujecca pieravažna ŭ časopisie «Dziejasłoŭ».
Jak viernik-unijat, dapamahaŭ raśpisvać carkvu ŭ Bieraści.
Aktyŭna ŭdzielničaje i ŭ ruchu baraćby za hramadzianskija pravy. I, da ŭsiaho, jak i mnohija palešuki, jon zaŭziaty rybak.
Pa słovach Paŭła, złoŭlenamu samu kala 15—20 hadoŭ, zavažyŭ jon na 65 kiłahramaŭ.
Sama Lachnovič zdaŭ na pravierku ŭ łabaratoryju, dzie skazali, što na radyjacyju jon vielmi čysty. Tamu ryba pojdzie na ježu Paŭłu i šmatlikim siabram.
