Tramp choča zaprasić na debaty eks-paluboŭnicu Biła Klintana
Dženifier Fłaŭers nie chavaje svajho minułaha. Fota Džeci imidžyz.
Kandydat u prezidenty ZŠA ad Respublikanskaj partyi Donald Tramp pryhraziŭ, što na pryznačanyja na paniadziełak debaty sa svajoj sapiernicaj Chiłary Klintan zaprosić Dženifier Fłaŭers, jakaja mieła luboŭnuju suviaź z byłym prezidentam Biłam Klintanam.
Adkazvajučy na krytyku miljardera Marka Kubana, jaki pachvaliŭsia tym, što vybarčy štab Chiłary Klintan zaprasiŭ jaho na debaty, Tramp napisaŭ u tvitary, što hatovy zaprasić Fłaŭers i pasadzić jaje ŭ pieršym šerahu. Kuban u minułym vioŭ telešou, jakoje kankuryravała z prahramaj Trampa, ale nie dasiahnuła jaje pośpiechu.
U tvitary i ŭ adkaz na pytańni žurnalistaŭ Fłaŭers nieŭzabavie paabiacała prysutničać na debatach. Pakul niezrazumieła, ci sapraŭdy Tramp zaprašaŭ jaje, ci ž jana interpretavała jaho tvit jak zaprašeńnie.
Vybarčyja štaby kandydataŭ raźmiarkoŭvajuć kvitki na pieradvybarčyja debaty na svajo mierkavańnie i časta vybirajuć haściej takim čynam, kab akazać palityčnaje ŭździejańnie na apanienta.
Tramp sam nie biezhrešny — druhaja z troch jaho žonak spačatku była jaho paluboŭnicaj, ź jakoj jon zdradžvaŭ pieršaj žoncy.
