Dekan fakulteta fiłasofii BDU braŭ udzieł u śviatkavańni «Dnia narodzinaŭ» čarnasocienskaha sajta
Viadučy prahramy ANT «Sprava pryncypu» i adnačasova dekan fakulteta fiłasofii i sacyjalnych navuk Biełaruskaha dziaržaŭnaha ŭniviersiteta Vadzim Hihin fihuruje na fotazdymkach sa śviatkavańnia ŭhodkaŭ resursu «Imchakłab».
Hety čarnasocienski resurs aryjentavany na biełaruskuju aŭdytoryju.
Zdymki apublikavaŭ u adkrytym dostupie adzin z udzielnikaŭ śviatkavańnia.
Vadzim Hihin siomy źleva.
Za stałom, u kampanii z Hihinym, siadziać vykładčyk BDPU imia Tanka Valancin Staryčonak, palitołah Piatro Piatroŭski, Alaksiej Dziermant (redaktar sajta) dy inšyja pravadniki idej «ruskaha śvietu» u Biełarusi. Jany, darečy, samyja častyja hości na prahramie Hihina.
Častka ź ich u minułym była viadomaja jak radykalnyja prychilniki biełaruskaj niezaležnaści, navat jak aktyvisty «bałtakryŭskich» inicyjatyŭ, ale z časam jany pierajšli ŭ rasijskija prajekty ź niajasnym, ale ščodrym finansavańniem.
Taksama za stałom byli hości z čarnasocienskich struktur z Rasii i Łatvii.
«Ja nie budu heta kamientavać», — tak adkazaŭ Vadzim Hihin na pytańnie «Našaj Nivy», čamu jon udzielničaŭ u hetaj biasiedzie.
Siabry «Imchakłaba» rehularna biaruć udzieł u rasijskich sieminarach, arhanizatary jakich raniej navučali ciapierašnich ideołahaŭ h.zv. «DNR» i «ŁNR».
Kiraŭnik i zasnavalnik «Imchakłaba» — žychar Łatvii Juryj Alaksiejeŭ, jaki zmahajecca za pravy ruskich u Łatvii. Juryj Alaksiejeŭ piša, u tym liku, na «Rehnum» — rasijski radykalna-čarnasocienski resurs, jaki ahulna krytykuje i Alaksandra Łukašenku, i biełaruskuju apazicyju.
Siarod kamientaŭ na staroncy Alaksiejeva ŭ fejsbuku možna znajści «chutka budziem vyzvalać Ryhu i Narvu».
