Rasija źniziła pastaŭki nafty ŭ Biełaruś na 37,6%
Skaračeńnie pastavak rasijskaj nafty pryviało da taho, što ŭ lipieni Biełaruś źniziła jaje impart na 37,6% u paraŭnańni z červieńskim abjomam, śviedčać papiarednija źviestki aficyjnaj statystyki.
U cełym za studzień—lipień Biełaruś impartavała z Rasii 12,7 młn ton nafty, što ŭ fizičnym vyražeńni na 5,3% mienš (abo na 713,4 tys. ton) u paraŭnańni z anałahičnym pieryjadam 2015 hoda.
Pry hetym u lipieni Biełaruś impartavała 1,18 młn ton, što na 37,6% mienš u paraŭnańni z červieńskim abjomam, kali było pastaŭlena praktyčna 1,9 młn ton nafty.
Nahadajem, u pieršym paŭhodździ Rasija štomiesiac pradavała Biełarusi 1,9—2 młn ton nafty, adnak u lipieni pryniała rašeńnie skaracić pastaŭki vuhlevadarodnaj syraviny. Padstavaj dla takoha rašeńnia staŭ rost zapazyčanaści Biełarusi za rasijski haz. Akramia taho, Minenierha RF zajaŭlała, što biełaruski bok nie vykonvaje abaviazacielstvy pa pastaŭkach naftapraduktaŭ na rasijski rynak.
Na minułym tydni Alaksandr Łukašenka daručyŭ uradu ŭ samyja karotkija terminy ŭrehulavać situacyju pa enierhietyčnych pytańniach z Rasijaj, adnak paśla pieramoŭ na ŭzroŭni vice-premjeraŭ pasolstva Biełarusi ŭ Rasii paviedamiła, što dasiahnuć kampramisu pa hazavym pytańni ŭradam dźviuch krain nie ŭdałosia.
Miž tym rasijski bok na dniach zajaviŭ, što ŭ čaćviortym kvartale Rasija maje namier praciahvać pastaŭki nafty ŭ Biełaruś pavodle skaročanaha hrafika.
Jak paviedamiŭ RIA Novosti pradstaŭnik «Tranśniefci» Ihar Dziomin, u trecim kvartale na biełaruskija NPZ budzie pastaŭlena 3,5 młn ton nafty, a ŭ čaćviortym — 3 młn ton (pa 1,5 młn ton na kožny naftapierapracoŭčy zavod Biełarusi).
Raniej premjer-ministr Biełarusi Andrej Kabiakoŭ zajaŭlaŭ, što skaračeńnie pastavak rasijskaj nafty pryvodzić da pahłybleńnia padzieńnia VUP. Tak, kali ŭ studzieni—červieni VUP Biełarusi źniziŭsia na 2,5% u paraŭnańni z anałahičnym pieryjadam minułaha hoda, to ŭ studzieni—lipieni padzieńnie skłała ŭžo 2,7%, a ŭ studzieni—žniŭni — dasiahnuła 3%.
