Źniesieny ŭ Kobrynie pomnik Suvoravu viernuć na miesca paśla restaŭracyi
— Heta čystaja vypadkovaść! Kiroŭca hruzavoj mašyny zdavaŭ zadnim chodam. Źleva-sprava jość ahlad, a zzadu prosta pa centry pomnik nie ŭbačyŭ. Tolki adčuŭ, što upiorsia ŭ niejkuju pieraškodu - vykarčavaŭ jaho, jak dreva, — raspaviadaje Nadzieja Žuk, načalnik adździeła ideałahičnaj raboty, kultury i pa spravach moładzi Kobrynskaha rajvykankama.
Zdavałasia b, niaznačnaja navina ŭmomant raźlaciełasia pa sacsietkach. Karystalniki tut ža ŭciahnulisia ŭ sprečki ab tym, ci patrebny Kobrynu pomnik rasijskamu pałkavodcu, jaki ŭdzielničaŭ u padaŭleńni paŭstańnia Tadevuša Kaściuški. Ale, jak akazałasia, heta pytańnie na paradku dnia nie staić. Pomnik źnieśli pa vypadkovaści, i paśla restaŭracyi jaho viernuć na miesca.
Heta zdaryłasia ŭ subotu dniom. Hruzavik miasakambinata pryvioz pradukcyju ŭ kafe, jakoje znachodzicca niepadalok ad muzieja-siadziby Suvorava. Kiroŭca byŭ u Kobrynie pieršy raz, nie viedaŭ, jak padjechać da kafe — i trapiŭ u takoje niedarečnaje DTZ.
— My vyklikali DAI, dyrekcyju miasakambinata. Strachavalniki pryjechali, bo mašyna zastrachavanaja. Usie aficyjnyja pracedury vykananyja, usio aformlena, — kažuć u adździele ideałohii. — Pomnik vynieśli va ŭnutrany dvor muzieja. Sam biust nie paškodžany, jon zrobleny z bronzy, paciarpieŭ tolki pastamient — adlacieła hranitnaja plita. Jak na złość, heta zdaryłasia napiaredadni 70-hodździa muzieja — da nas praz tydzień pryjeduć hości. Rabočyja paabiacali, što da jubileju jaho adrestaŭrujuć i viernuć na miesca.
Darečy, hety pomnik byŭ adlity skulptaram Kiufierle i ustalavany pierad domam-muziejem Suvorava ŭ 1950-m hodzie. A sam muziej uklučany ŭ Śpis historyka-kulturnych kaštoŭnaściaŭ Biełarusi. Usiaho ŭ Kobrynie try pomniki pałkavodcu — jašče adzin biust staić u parku imia Suvorava, a ŭ centry horada - skulptura hienieralisimusa ŭ poŭny rost.
