Ramieśnikam i ŭładalnikam ahrasiadzib chočuć pavysić padatki
U 2017 hodzie miascovyja orhany ŭłady mohuć atrymać prava pavysić staŭki padatkaŭ dla ramieśnikaŭ i ŭładalnikaŭ ahrasiadzib. Pra heta raspavioŭ namieśnik ministra finansaŭ Juryj Sielivierstaŭ na pasiadžeńni pastajannaj kamisii pa ekanamičnaj palitycy ŭ Pałacie pradstaŭnikoŭ.
Praŭda, dla miascovych savietaŭ deputataŭ pastaviać abmiežavańnie: staŭku padatku možna budzie padniać nie bolš čym u try razy.
Ciapier staŭka składaje adnu bazavuju vieličyniu (21 rubiel). Heta značyć, što maksimum, jaki pryjdziecca płacić ramieśnikam ci ŭładalnikam ahrasiadzib, — 63 rubli na hod.
«Dla tych, chto realna zajmajecca spravaj, dadatkova dźvie bazavyja vieličyni nie stanuć pieraškodaj», — vykazaŭ svajo mierkavańnie Juryj Sielivierstaŭ i ŭdakładniŭ, što pryniaćcie takoha rašeńnia zusim nie kaža pra toje, što staŭki padymuć va ŭsich rehijonach krainy adrazu.
Nahadajem, u kancy minułaha hoda čynoŭniki ŭžo abmiarkoŭvali mahčymaść pavyšeńnia padatku dla hetaj katehoryi. Tak, dla ŭładalnikaŭ siadzib padachodny padatak prapanoŭvałasia pavialičyć z adnoj da 12 bazavych vieličyń u hod, a dla ramieśnikaŭ — z adnaho da čatyroch u hod. Adnak deputaty nie padtrymali hetuju prapanovu.