Minčanku zaprasili prahałasavać na dvuch roznych učastkach
Zaprašeńnie paŭdzielničać u parłamienckich vybarach Tamary Mackievič dasłali adrazu dźvie ŭčastkovyja kamisii: №680 i №683. I tam, i tam hatovyja byli pryniać jaje hołas.
Žančyna napisała skarhu, u jakoj praz takoje hrubaje parušeńnie Vybarčaha kodeksu prasiła anulavać vyniki vybaraŭ na hetych učastkach.
«Ja nie ŭvachodžu ni ŭ jakuju sietku nazirańnia. Ale, kali atrymała dva zaprašeńni, na ŭsialaki vypadak paprasiła vyłučyć mianie na svoj učastak ad hramadskaj arhanizacyi. Kab mnie nie dali druhi biuleteń, ja b nie pajšła hladzieć padlik.
Da nazirańnia za padlikam jak naziralnicu mianie nie padpuścili. Skazali adyści na try mietry, bo tak patrabuje zakon. Ja dastała Vybarčy kodeks i paprasiła pakazać mnie punkt, dzie heta napisana. Tady «kamisar» skazaŭ: «Nie my heta prydumali». Ja pytałasia, ci možna zirnuć kali nie na biuleteni, to choć na papierki ź ličbami, jakija pišuć siabry kamisii i pieradajuć sakrataru. Staršynia kamisii zabaraniła.
Jašče zaŭvažyła stosy biuleteniaŭ u skryni z daterminovym hałasavańniem. Ich dakładna pakłali ŭ skryniu, a nie kidali ŭ ščylinu. Uvieś stos «kamisar» pakłaŭ u adnu kipu. Navat nivodnaha «sapsavanaha» nie zrabili dla padliku. Potym usie stosy źmiašali», — napisała Tamara Mackievič u fejsbuku.