Apple prezientavała novy iPhone, razumny hadzińnik i biespravadnyja navušniki
Kampanija «Apple» praviała prezientacyju, dzie prezientavała novyja pradukty i mahčymaści ŭ technicy ich vytvorčaści.
Pieršaj navinoj staŭ vychad suśvietna viadomaj hulni Mario na sistemie iOS i novaha chita «Pokemon Go» na razumnym hadzińniku Apple Watch.
Paśla Apple prezientavali novy hadzińnik Apple Watch: Series 2. Jak u novaj, tak i ŭ papiaredniaj viersii źjaviacca novyja funkcyi: adkazy na paviedamleńni ciapier možna pisać prama z hadzińnika, raniej ža treba było brać u ruki telefon. U novaj madeli hadzińnik staŭ vodaniepranikalnym da hłybini ŭ 50 mietraŭ.
Hadzińnik zmoža padličvać kałoryi, jakija tracić čałaviek, ekran staŭ jarčej, źjaviŭsia GPS. Dla tych, chto choča vyłučacca, źjaviłasia viersija hadzińnika ŭ kieramičnym korpusie. Minimalny košt Apple Watch: Series 2 — $369. Cana na staruju viersiju hadzińnika źnizicca da $269. Novy hadzińnik Apple pačnie pradavać z 19 vieraśnia.
I, viadoma, nie abyjšłosia biez prezientacyi novaha iPhone 7 i iPhone 7 Plus. Pieršaje, što kidajecca ŭ vočy iPhone 7 Plus — dźvie kamiery.
Iphone 7 Plus. Usia zadniaja panel šklanaja. Taksama amal nie bačna prožyłkaŭ anteny, jakija byli ŭ papiarednich iPhone.
Raspracoŭščyki papracavali nad knopkaj «Home» — knopka adčuvaje siłu cisku, h.zn. stała jak ekran z technałohijaj 3D Touch. iPhone adhukajecca na dotyk, i ŭsie prahramy mohuć vykarystoŭvać Taptic Engine knopki. iPhone, jak i Apple Watch: Series 2 staŭ abaronieny ad vady i pyłu.
Novy čyp: A10 Fusion. Čatyrochjadzierny, kampanija zajaŭlaje, što samy mocny ŭ śviecie. Zaradka telefona ciapier budzie trymać na 1—2 hadziny bolš. Uvohule temu batarei Apple chutka praskočyli. Vidać, prablemu sa słabym akumulataram tak i nie vyrašyli. Dastupnyja buduć try viersii — 32, 128 i 256 Hb. Viersiju na 16 i 64 Hb prybrali.
U zvyčajnym Iphone 7 budzie tolki adzin abjektyŭ.
Palepšyli kamieru — razroźnieńnie sensara 12 Mp, uspyška z čatyrma dyjodami. Novy sensar vyznačaje, što sfatahrafavana, i padbiraje dla hetaha najlepšyja ŭmovy. Piksieli stali bolšymi i zachoplivajuć bolš śviatła. Aŭtafokus staŭ dakładniejšy i chutčejšy, a va ŭbudavanaj uspyšcy ciapier 4 śviatłodyjody zamiest dvuch. Frantalnaja kamiera taksama stała lepšaj — 7 Mp, lepš pracuje z kolerami, mienš šumić.
Ciapier asobna pra dźvie kamiery. iPhone 7 Plus maje dva abjektyvy — teleabjektyŭ i šyrokavuholny abjektyŭ. Choć kampanija i abiacaje dziesiacirazovaje pavieličeńnie biez mocnaj straty jakaści, kamiera zastałasia ličbavaj, a nie aptyčnaj. Zatoje budzie dvuchrazovy aptyčny zum.
A ciapier da samaj vialikaj intryhi dla tych, chto čakaŭ novy iPhone — navušniki. U novym iPhone 7 niama asobnaha ŭvachodu dla navušnikaŭ, ciapier pryjdziecca vykarystoŭvać adaptar:
Taki adaptar dla ŭvachoda 3,5 mm na Lightning budzie iści ŭ kamplekcie da novaha iPhone.
Ale jość i dobraja navina: kampanija ličyć, što pravady — heta minułaje stahodździe, tamu jany vypuścili biespravadnyja navušniki AirPods:
Navušniki zmohuć pracavać 5 hadzin biez padzaradki. Ale, zdajecca, hałoŭnaje — nie zhubić ich.
Ahułam cana novaha iPhone z navušnikami, adaptaram, zaradkaj — ad $649, iPhone 7 Plus — ad 769. Start prodažu ŭ ZŠA — 16 vieraśnia.
Apošniaj navinoj dla ŭsich karystalnikaŭ pradukcyi Apple staŭ vychad apieratyŭnaj sistemy iOS 10. Kožny achvotny zmoža abnavić prašyŭku z 13 vieraśnia.
