Vialikabrytanija pabuduje ŭ Francyi ścianu ad mihrantaŭ
Łondan uźviadzie ŭ francuzskim Kale ścianu, jakaja pieraškodzić mihrantam niezakonna traplać u hruzaviki, jakija jeduć u Vialikabrytaniju. Budaŭničyja pracy aceńvajucca prykładna ŭ 2,4 miljonaŭ jeŭra.
Dracianaja zaharoda ŭ Kale. Fota: Reuters
Łondan uźviadzie ścianu ŭzdoŭž aŭtamahistrali, jakaja viadzie da francuzskaha porta Kale, dzie sabralisia niekalki tysiač mihrantaŭ, jakija sprabujuć niezakonnym čynam trapić na terytoryju Vialikabrytanii. Zaharoda zaklikanaja pieraškodzić biežancam prabiracca ŭ hruzavyja aŭtamabili, jakija paźniej z dapamohaj paromnaj pierapravy traplajuć u brytanski Duŭr.
«My ŭ bližejšy čas pačniom budavać hetuju ścianu. U nas užo jość płot, ciapier čarha za ścianoj», — zajaviŭ u aŭtorak, 6 vieraśnia, Robiert Hudvił, dziaržsakratar, jaki adkazvaje ŭ MUS Vialikabrytanii za pytańni imihracyi.
Na ŭźviadzieńnie ścieny spatrebicca kala 2,4 młn jeŭra. Prajekt byŭ uzhodnieny z francuzskim bokam jašče ŭ sakaviku, zaviaršeńnia budaŭnictva varta čakać da kanca hoda.
Pavodle acenak Paryža, Vialikabrytanija z 2014 hoda ŭžo vydatkavała kala 100 młn jeŭra na pavyšeńnie mier biaśpieki ŭ porcie Kale i achovu Jeŭratunela pad Ła-Manšam.