«Sputnik i pahrom» paličyŭ biełaruskija miedali Alimpijady jak «ruskija», ale vykraśliŭ Hierasimieniu, Hamzatava i Saidava
Rasijski šavinistyčny sajt «Sputnik i pahrom» znoŭ udaryŭsia ŭ zvykłyja dla siabie fantazii. Na hety raz resurs Jahora Praśvirnina kinuŭsia padličvać, kolki ž miedaloŭ u Rya-de-Žanejra zavajavali «ruskija» spartsmieny.
Pierš-napierš sa śpisu «ruskich» byli vykinutyja ŭsie pradstaŭniki kaŭkazskich narodaŭ, jakija tradycyjna dobra vystupajuć u adzinaborstvach.
«Sputnik i pahrom» vyrašyŭ taksama nie ŭklučać ukrainskich miedalistaŭ. Heta jany patłumačyli žadańniem nie padstaŭlać «ruskich» spartsmienaŭ Ukrainy.
A voś biełaruskaja zbornaja była ŭklučanaja amal u poŭnym składzie. Vyklučeńniem stali barcy Džavid Hamzataŭ i Ibrahim Saidaŭ, a taksama płyŭčycha Alaksandra Hierasimienia.
Kali z Hamzatavym i Saidavym usio jasna, to Hierasimieniu nie ŭklučyli z pryčyny taho, što jana ličyć siabie «biełaruskaj». Tak-tak, słova «biełarusy» hety čarnasocienski sajt biare ŭ dvukośsi, padkreślivajučy, što nijakaj Biełarusi niama.
Taksama ź niejkaj pryčyny sa śpisu «ruskich» była vyklučana viaślarka Maryna Litvinčuk, chacia try jaje partniorki pa čoŭnie ŭklučanyja.
Jašče ŭ «ruskija» spartsmieny ŭklučanyja niekatoryja kazachi, azierbajdžancy i niemcy.
Voś tak niekatoryja rasijskija sajty sprabujuć pryvučyć, što Biełaruś — heta častka Rasii. A tym biełarusam, jakija z hetym nie zhodnyja, nie miesca ŭ «ruskim śviecie».
Praŭda, takija fantazii šavinistaŭ vyhladajuć absalutna absurdnymi i niedarečnymi.