ZŠA inviestujuć $2,5 młrd u chutkasnyja čyhunki
Urad ZŠA vydaść kredyt u 2,45 młrd dalaraŭ apierataru čyhunak Amtrak dla pakupki novych ciahnikoŭ, palapšeńnia puciej i płatformaŭ, paviedamiŭ vice-prezident Džozef Bajden.
Getty
Ministerstva transpartu zajaviła, što heta samy bujny kredyt za ŭsiu historyju jaho isnavańnia.
Palapšeńni zakranuć čyhunačnuju sietku na paŭnočnym uschodzie ZŠA. U płany kampanii ŭvachodzić, naprykład, raźvićcio chutkasnych čyhunak pamiž Vašynhtonam i Bostanam.
Bajden zajaviŭ, što treba pašyrać inviestycyi ŭ infrastrukturu.
«Nam patrebnyja takija inviestycyi, kab prymusić uvieś hety rehijon, dy i krainu ŭ cełym, ruchacca napierad i stvarać novyja pracoŭnyja miescy», — zajaviŭ Bajden.
Čyhunačnaja sistema ZŠA adstaje ad inšych raźvitych krain, asabliva heta prykmietna ŭ siektary chutkasnych daroh.
Amtrak płanuje pačać ruch novych ciahnikoŭ ŭ 2021 hodzie. Ich chutkaść składzie 160 mil (257 kiłamietraŭ) u hadzinu, a technična jany buduć zdolnyja razhaniacca da 180 mil (kala 300 km) u hadzinu.
U novych ciahnikach budzie na tracinu bolš pasažyrskich miescaŭ.
Paŭnočna-ŭschodni transpartny kalidor ZŠA — adzin z samych zahružanych u krainie. Na hetym maršrucie znachodziacca Vašynhton, Bostan i Ńju-Jork. Pavodle dadzienych Amtrak, u 2015 hodzie im skarystałasia rekordnaja kolkaść pasažyraŭ — 11,7 miljona čałaviek.
