«Biełavija» prakamientavała situacyju na rejsie z Burhasa ŭ Minsk
Avijakampanija «Biełavija» prakamientavała situacyju na borcie svajho samalota, jaki vykonvaŭ 20 žniŭnia rejs z bałharskaha Burhasa ŭ Minsk.
U sacyjalnaj sietcy Facebook uviečary 20 žniŭnia źjaviłasia paviedamleńnie ad adnaho z pasažyraŭ rejsa. Jon, u pryvatnaści, adznačaŭ, što ludzi na borcie padčas palotu hublali prytomnaść, niekatorych vanitavała, a ściuardesy biehali z bałonami z kisłarodam «praktyčna ŭ panicy». Reahujučy na dadzieny post, karystalniki Facebook źviarnuli ŭvahu na toje, što samalot «Biełavija», sapraŭdy, lacieŭ na vyšyni nižej zvyčajnaj, što, jak jany ličać, mahło tłumačycca strataj cisku ŭ sałonie.
Razam z tym «Biełavija» padkreślivaje, što nijakich pazaštatnych situacyj na borcie nie było. U kamientary ad 21 žniŭnia, havorycca, što na 20 chvilinie palotu da kabinnaha ekipažu źviarnuŭsia pasažyr sa skarhaj na drennaje samaadčuvańnie ŭ suviazi z zaduchaj ŭ sałonie. Paśla zvarotu bortpravadniki adznačyli, što stan pasažyra paharšajecca. U adpaviednaści z «Instrukcyjaj kabinnaha ekipaža» bortpravadniki zrabili abjavu, ci jość siarod pasažyraŭ miedycynskija rabotniki, a taksama dałažyli kamandziru pavietranaha sudna ab situacyi. Dvoje lekaraŭ, jakija apynulisia na borcie, razam z ekipažam akazali dapamohu pasažyru. Kamandzir pavietranaha sudna źmianiŭ tempieraturu pavietra ŭ sałonie, a taksama pryniaŭ rašeńnie ab źnižeńni ešałona palotu z 7.200 mietraŭ da 4.200 mietraŭ dla stvareńnia bolš kamfortnych umoŭ dla chvoraha pasažyra. Adnačasova z hetym, ekipaž pierakanaŭsia, što praca sistemy kandycyjanavańnia adpaviadaje patrebnym paramietram i praciahnuŭ palot.
Paśla pasadki ŭ Nacyjanalnym aeraporcie «Minsk» ekipaž vyklikaŭ bryhadu chutkaj dapamohi da trapa samalota. Lekary acanili stan pasažyra: dadatkovaj miedycynskaj dapamohi nie patrabavałasia. Nichto z pasažyraŭ pa miedycynskuju dapamohu nie źviartaŭsia, udakładniaje «Biełavija».
«Inžynierna-techničnym piersanałam avijakampanii było praviedziena dadatkovaje testavańnie pracazdolnaści sistemy kandycyjanavańnia i, u suviazi z adsutnaściu zaŭvah, pavietranaje sudna praciahnuła vykanańnie palotaŭ. 20 i 21 žniŭnia 2016 hoda na dadzienym samalocie byli vykanany paloty ŭ Varnu i Burhas biez zaŭvah», - padkreślivajecca ŭ kamientary avijakampanii.
Pry vykanańni rejsa B2-8362 z Burhasa ŭ Minsk na borcie było 149 darosłych pasažyraŭ, 6 dziaciej da dvuch hadoŭ, a taksama 7 členaŭ ekipaža.
