Alaksieju Janukieviču zabaranili mitynhi pa-za miežami staličnaj akruhi, dzie jon bałatujecca
Minski harvykankam zabaraniŭ staršyni Partyi BNF Alaksieju Janukieviču pravodzić ahitacyjnyja mierapryjemstvy pa-za miežami Aŭtazavodskaj vybarčaj akruhi № 92, dzie jon zarehistravany ŭ jakaści kandydata ŭ deputaty.
Jak paviedamlaje pres-słužba kampanii nazirańnia «Prava vybaru — 2016», pieršy mitynh palityk zapłanavaŭ 25 žniŭnia na placoŭcy pierad Pałacam sportu, druhi — 8 vieraśnia kala opiernaha teatra. Davieranymi asobami kandydata byli padadzienyja adpaviednyja paviedamleńni ŭ Minharvykankam. Adnak adtul adkazali listom za podpisam namieśnika staršyni vykankama Ihara Karpienki, jaki taksama ź`iaŭlajecca staršynioj Kampartyi Biełarusi. U adkazie havorycca, što paviedamlalnym paradkam praviadzieńnia schodaŭ kandydat moža skarystacca tolki ŭ miežach svajoj vybarčaj akruhi. U inšych miescach stalicy dla praviadzieńnia mitynhaŭ kandydatu treba brać dazvoł u adpaviednaści z zakonam «Ab masavych mierapryjemstvach», źviarnuŭšysia pa jaho za 15 dzion da dnia praviadzieńnia. Minharvykankam spasyłajecca na artykuł 491 Vybarčaha kodeksa, a taksama na ahulny pryncyp praviadzieńnia vybaraŭ u Biełarusi pa adnamandatnych vybarčych akruhach.
Adkaz harvykankama prakamientavaŭ juryst Juryj Čavusaŭ: «Vybarčy kodeks ustanaŭlivaje prava kandydataŭ i ich davieranych asobaŭ pravodzić mitynhi, pikiety i schody pa zajaŭnym pryncypie, prosta paviedamiŭšy pra miesca praviadzieńnia mierapryjemstva za dva dni da daty praviadzieńnia. Hetki paradak značana bolš libieralny za ahulny dazvalalny paradak, jaki dziejničaje dla schodaŭ nieahitacyjnaha charaktaru na padstavie zakona «Ab masavych mierapryjemstvach». Adnak zhadany čynoŭnikami artykuł 491 Vybarčaha kodeksa nie ŭtrymlivaje anijakaj uzhadki pra toje, što takija schody mohuć pravodzicca kandydatami tolki na terytoryi asobnaj vybarčaj akruhi. Minharvykankam u hetym adkazie advolnym čynam daje tłumačeńnie zakanadaŭstva, jakoje zvužaje mahčymaści kandydataŭ i biespadstaŭna paharšaje umovy dla ich ahitacyjnaj dziejnaści. Hetkaja advolnaja zakonatłumačalnaja dziejnaść orhana vykanaŭčaj ułady vychodzić za miežy jaho kampietencyi. I, na moj pohlad, heta značna abmiažoŭvaje mahčymaści kandydataŭ u praviadzieńni ahitacyi».
Juryst taksama adznačyŭ, što sioleta ŭłady vyrašyli farmalna dapuścić apazicyjnych kandydataŭ da ahitacyi, ale pry hetym uviali šerah novych, nie zasnavanych na zakonie, abmiežavańniaŭ, jakija supiarečać raniejšaj praktycy praviadzieńnia ahitacyjnych kampanij.
Raniej prahramy kandydataŭ vykładalisia taksama na sajtach dziaržaŭnych haziet — ciapier hetaha niama, havoryć Čavusaŭ. Na minułych vybarach televystupy kandydataŭ i teledebaty byli dastupnyja anłajn — ciapier dziaržaŭnaje telebačańnie nie tolki nie raźmiaščaje hetyja materyjały ŭ siecivie, ale ŭsialak imkniecca źniščyć miedyjnuju ci publičnuju prysutnaść apazicyjnych palitykaŭ. Heta zvodzić udzieł demakratyčnych kandydataŭ u vybarach da farmalnaha, ličyć jon.
Što da mierapryjemstvaŭ 25 žniŭnia i 8 vieraśnia, jakija byli zapłanavanyja Alaksiejem Janukievičam, to jany ŭsio roŭna adbuducca: paśla adkazu čynoŭnikaŭ na praviadzieńnie hetych mitynhaŭ byli padadzienyja paviedamleńni ad davieranych asobaŭ inšaha kandydata Partyi BNF Uładzimira Padhoła, što bałatujecca pa Staravilenskaj vybarčaj akruzie № 105, terytoryja jakoj uklučaje hetyja placoŭki.
20 žniŭnia na fakt niezakonnaha abmiežavańnia prava na praviadzieńnie pieradvybarčaj ahitacyi davieranymi asobami Alaksieja Janukieviča padadzienaja skarha ŭ Minskuju haradskuju vybarčuju kamisiju. Zakanadaŭstva daje terytaryjalnaj kamisii try dni na razhlad skarhi.
