Pavieł Duraŭ: Elemienty novaha dyzajnu VK byli ŭślapuju skapijavanyja z Fejsbuka
Zasnavalnik Ukantakcie vykazaŭ na svajoj staroncy 7 pretenzij da novaha dyzajnu sacyjalnaj sietki.
17 žniŭnia Ukantakcie całkam pierajšła na novy dyzajn.
1. Hałoŭny raździeł sajta — Naviny — staŭ bolš vuzkim. Paradaksalna, što nieabchodnaść redyzajnu abhruntoŭvałasia imknieńniem bolš efiektyŭna vykarystoŭvać ekran. Pa fakcie, kali paraŭnać šyryniu zapisaŭ u staroj i novaj viersii, naviny zvuzilisia na 28px.
2. Naviny — jak i ŭsie inšyja raździeły — stali nižej na 42px. Praź fiksavanuju šapku viertykalnaja prastora sajta stała mienšaj, treba bolš pramotvać. Heta surjoznaje źmianieńnie da horšaha: mienavita viertykalny skroł ujaŭlaje saboj deficyt na bolšaści dysplejaŭ.
3. Pry prahladzie hałoŭnaha raździeła sajta — Navin — hublajecca fokus na kantencie. U novaj viersii źjaviłasia vizualnaje śmiećcie ŭ vyhladzie fiksavanaj pravaj kałonki, jakaja redka vykarystoŭvajecca. Z ulikam fiksavanaj šapki i vuzkaj šyryni, prahlad navin staŭ udvaja bolš zachłamleny.
4. Pry prahladzie fota zhubleny fokus na samoj vyjavie. Fota ssunutyja ŭleva, a jarkaja plama biełaj kałonki kamientaroŭ, jakaja źjaviłasia sprava, pieraciahvaje na siabie uvahu. Heta rašeńnie było skapijavana z Fejsbuka, jaki ŭ svoj čas uvioŭ pravuju kałonku dla raźmiaščeńnia dadatkovych rekłamnych błokaŭ.
5. Statyčnaja levaja kałonka pry pramotcy starych zapisaŭ asabistych staronak nie tolki nie daje patrebnaj infarmacyi, ale i zvužaje haryzantalnuju prastoru dla prahladu zapisaŭ u paraŭnańni sa staroj viersijaj. Anałahičnaja situacyja — pry prahladzie zapisaŭ u hrupach i pablikach.
6. Zamiena biełaha koleru fonu na šery nie tolki pamienšyła adčuvańnie čyścini i minimalizmu, ale i ŭ cełym zrabiła sajt bolš sumnym i pachmurnym. Ciomna-šeryja ikonki na šerym mieniu źleva na ŭsich staronkach lišnija i ŭjaŭlajuć saboj vizualnaje śmiećcie.
7. Stary łahatyp «Ukantakcie» lepš upisvaŭsia ŭ haryzantalnuju šapku, čym novy łahatyp «VK». Ja namalavaŭ abodva łahatypy dosyć daŭno (pieršy kala 10 hadoŭ tamu, druhi — kala 5), ale ŭ ruskamoŭnaj viersii nie zamianiaŭ stary łahatyp mižnarodnym mienavita ŭ siłu hetaj — dosyć vidavočnaj — akaličnaści.
Vynik: stary dyzajn Ukantakcie, jaki nie mianiaŭsia niekalki hadoŭ, biezumoŭna, mieŭ patrebu ŭ dapracoŭkach i estetyčnym pieraasensavańni ŭ miežach novych stylaŭ. Adnak praviedzieny redyzajn nie tolki nie adpaviadaje standartam 15-16 hoda (takim, jak Material), ale i źnižaje juzabielnaść resursu.
Usie pieraličanyja elemienty novaha dyzajnu byli ŭślapuju skapijavanyja z Fejsbuka ŭzoru 2012. Fejsbuk u hetyja hady byŭ vymušany naroščvać prybytkovaść u miežach IPO, tamu ŭ prajektavańni dyzajnu achviaravaŭ intaresami karystalnikaŭ dziela mahčymaści dadavańnia novych rekłamnych błokaŭ. Adsiul źjaviłasia i pravaja kałonka ŭ navinach i fotazdymkach, i źnižeńnie fokusu na kantencie dziela rekłamy.
Siońnia, kali manietyzacyja Ukantakcie pieranosicca ŭ «razumnuju» stužku i mabilnyja klijenty, takija kroki nie abhruntavanyja. U 2016-m hodzie Fejsbuk pavinien byŭ kapijavać napracoŭki Ukantakcie, a nie naadvarot.
A jak vy aceńvajecie novy dyzajn? Vykazvajciesia ŭ kamientarach!
