Pačynała ŭ lohkaj atletycy, udzielničała ŭ churale — cikavyja fakty pra pieršuju biełaruskuju miedalistku Darju Navumavu
Pieršaj biełaruskaj miedalistkaj u Rya-2016 stała ciažkaatletka Darja Navumava. «Naša Niva» znajomić čytačoŭ z srebranaj pryziorkaj Alimpijady.
Naradziłasia ŭ Kličaŭskim rajonie
Darja naradziłasia ŭ vioscy Patoka Kličaŭskaha rajona. Navumavy — šmatdzietnaja siamja. Ciapier spartsmienka žyvie ŭ Babrujsku.
Navumavaj usiaho 20 hadoŭ. 26 žniŭnia jana budzie śviatkavać svoj nastupny dzień naradžeńnia.
Spartsmienka navučajecca ŭ vučyliščy alimpijskaha reziervu, jakoje maje skončyć ŭ 2020 hodzie.
Čempijonkaj jašče nie była
U dziacinstvaje Darja pačynała zajmacca lohkaj atletykaj — šturchańniem jadra i kidańniem dzidy. Ale ŭ 10 kłasie źmianiła profil na ciažkuju atletyku.
Navumava vystupaje ŭ vazie da 75 kh, i jaje karjera na darosłym uzroŭni jašče tolki pačynajecca. Na letašnim čempijanacie Jeŭropy spartsmienka zaniała 4-je miesca, a na čempijanacie śvietu — 6-je miesca.
Hałoŭny favaryt zbornaj
Vyniki biełaruskich spartsmienaŭ na Alimpijadzie, miakka kažučy, nie samyja paśpiachovyja. Adnak heta nie navina — pierad pačatkam spabornictvaŭ adno z najbujniejšych mižnarodnych infarmacyjna-navinavych ahienctvaŭ Associated Press skłała miedalny prahnoz. Na dumku ahienctva, Biełaruś musiła zavajavać siem miedaloŭ, ź jakich tolki adzin — załaty. I jaho virtualna «prysudzili» mienavita Navumavaj.
Udzielnica churała
Sioleta Navumavu ŭklučyli ŭ skład delehacyi Babrujska na ŭsiebiełaruski schod. «Z prajektam Prahramy sacyjalna-ekanamičnaha raźvićcia Respubliki Biełaruś na 2016 - 2020 hady ja aznajomiłasia i liču, što absalutna ŭsie jaje punkty vielmi značnyja. I nie tolki dla mianie asabista, ale i dla ŭsiaho biełaruskaha naroda, dla našaj krainy», — nibyta zajaviła navučenka vučylišča alimpijskaha reziervu miascovaj presie.
