Baćki zabitych u Bienhazi amierykancaŭ padali ŭ sud na Klintan
Sud akruhi Kałumbija pryniaŭ pazoŭ suprać kandydata ad Demakratyčnaj partyi Chiłary Klintan. Baćki zahinułych u Bienhazi ŭ 2012 hodzie amierykancaŭ abvinavacili jaje ŭ śmierci svaich dziaciej, a taksama ŭ paklopie.
Baćki dvuch z čatyroch amierykancaŭ, jakija zahinuli ŭ vyniku napadu na dypmisiju ZŠA ŭ Bienhazi, Livija, u 2012 hodzie, padali pazoŭ suprać kandydata na pasadu prezidenta ad Demakratyčnaj partyi Chiłary Klintan, paviedamlaje Fox News.
Pazoŭ pastupiŭ u akruhovy sud akruhi Kałumbija. Baćki supracoŭnika dypsłužby Šona Śmita i byłoha śpiecnazaŭca Tajrana Vudsa ličać, što Klintan vinavataja ŭ śmierci ich dziaciej, a taksama ŭ paklopnickich vykazvańniach u ich adras i pryčynieńni emacyjnych pakut rodnym zahinułych.
Pazoŭniki paličyli, što vykarystańnie Klintan pryvatnaha sierviera elektronnaj pošty spryjali hibieli Śmita i Vudsa, pakolki terarysty zmahli atrymać infarmacyju pra miescaznachodžańnie pasła Krystafiera Styviensa, a zatym arhanizavać, spłanavać i ažyćciavić napady 11 vieraśnia 2012 hoda.
Baćki zahinułych taksama ličać, što Klintan zhańbiła ich u zajavach dla ŚMI. «Padčas svajoj pieradvybarnaj kampanii Klintan biezadkazna abo złamysna hańbiła pazoŭnikaŭ. Albo prama nazyvała ich chłusami, albo namiakała na toje, što jany padmanvajuć. Z dapamohaj hetych zajaŭ Klintan sprabavała palepšyć svoj imidž», — havorycca ŭ poźvie. Akramia taho, pazoŭniki ličać, što jana naniesła im maralnuju škodu, a taksama sprabavała jak minimum čatyry razy prymusić ich zamaŭčać, kab jany nie ŭzdymali pytańnie ab napadzie ŭ Bienhazi.
Hibiel čatyroch amierykancaŭ u Bienhazi 11 vieraśnia 2012 stała adnym z hałoŭnych punktaŭ abvinavačvańniaŭ suprać Chiłary Klintan, jakaja ŭ toj čas była Dziaržsakratarom. Pry napadzie zahinuŭ ambasadar Krystafier Styviens. Vašynhton zajaviŭ, što hramadzianie ZŠA zahinuli pry spantannaj akcyi pratestu musulman u adkaz na trejler filma «Niavinnaść musulman», jaki byŭ vykładzieny na videachostynhu YouTube.
U hety čas u ZŠA prachodziła prezidenckaja honka, u finale jakoj na druhi termin byŭ pieraabrany Barak Abama. Užo ŭ 2013 hodzie, paśla taho, jak Abama zaniaŭ Avalny kabiniet na druhi termin, źjavilisia abvinavačvańni, što aficyjnyja asoby, jakija aśviatlali kanflikt, u tym liku Klintan, chłusili. Palityčnyja praciŭniki demakrataŭ abvinavacili ich u tym, što ab charaktary napadu było viadoma ŭžo ŭ toj momant — heta byli nie spantannyja pratesty, a terakt. Bolš za toje, Dziarždep paprakali ŭ tym, što boj na terytoryi dyppradstaŭnictva doŭžyŭsia niekalki hadzin i za hety čas vojska mahło akazać dapamohu amierykancam, ale nie zrabiła hetaha.
Rasśledavańniem incydentu zajmałasia śpiecyjalnaja kamisija kanhresa. Svaje pakazańni davała kamisii i Klintan. Jana ŭziała na siabie adkaznaść za toje, što adbyłosia ŭ Bienhazi i zajaviła, što paśla hetaha napadu praviała ceły šerah reform pa ŭzmacnieńni biaśpieki amierykanskich dypłamataŭ.