Biełaruski snajpier staŭ trecim na mižnarodnych vajskovych spabornictvach
Biełaruski strałok zaniaŭ treciaje miesca na mižnarodnym konkursie «Snajpierski rubiež», jaki prachodzić u Kazachstanie, paviedamlaje soyuz.by.
Fota: defence.ru
Na pieršym etapie spabornictvaŭ «Stralba na zalik» nieabchodna było papaści ŭ cel sa snajpierskaj vintoŭki SVD-S. Stralba viałasia z adlehłaści ŭ 300 m pa hrudnoj mišeni, u hetym spabornictvie było 72 ŭdzielniki.
Kab papaści ŭ cel, strałku vydavałasia pa 10 patronaŭ i piać chvilin na vykanańnie praktykavańnia.
Najlepšy vynik pakazaŭ kursant rasijskaha ahulnavajskovaha kamandnaha vučylišča z Dalokaha Uschodu, jaki nabraŭ za 1,51 chviliny 93 bały. Druhi vynik u pradstaŭnika Manholii — 91 bał za 2,5 chviliny. Na trecim miescy akazaŭsia snajpier ź Biełarusi.
U dalejšym ŭdzielniki konkursu buduć zmahacca za pieramohu jašče ŭ dvuch praktykavańniach: «Snajpier u abaronie» i «Snajpier u nastupie». Usiaho ŭ spabornictvach, jakija prachodziać z 2 pa 9 žniŭnia na navučalnym palihonie adnoj z vajskovych baz, raźmieščanych u Žambyłskaj vobłaści Respubliki Kazachstan, biaruć udzieł vajskoŭcy z 12 krain: Armienii, Biełarusi, Vieniesueły, Hrecyi, Zimbabve, Indyi, Irana, Kazachstana, Kirhizii, Kitaja, Manholii i Rasii.