Zasnavalnik NISEPD: Pakazany pa «Biełaruś 1» repartaž stvorany na falsifikacyjach i manipulacyjach
Pakazany pa telekanale «Biełaruś 1» repartaž pra dziejnaść Niezaležnaha instytuta sacyjalna-ekanamičnych i palityčnych daśledavańniaŭ «zasnavany na falsifikacyjach i manipulacyjach», zajaŭlaje zasnavalnik NISEPD sacyjołah Aleh Manajeŭ.
Aleh Manajeŭ. Fota racyja.com.
Śpiecyjalny repartaž pad nazvaj «Sacyjałahičnyja apytańni pra Biełaruś: praŭda ci padrobka?» byŭ pakazany 31 lipienia ŭ pieradačy «Hałoŭny efir» na kanale «Biełaruś 1». U im śćviardžałasia, što NISEPD nasamreč nie pravodzić u Biełarusi sacapytańni, adpaviedna, jaho daśledavańni źjaŭlajucca falsifikacyjaj i im nielha daviarać. Praź niekalki hadzin anałahičnyja materyjały apublikavali dva hałoŭnych dziaržaŭnych ŚMI — hazieta «Savieckaja Biełaruś» i infarmahienctva BiełTA.
«Śpiecyjalny repartaž» Biełaruskaha dziaržaŭnaha telebačańnia zasnavany na falsifikacyjach i manipulacyjach, razam z «pryznańniami» ludziej, tak ci inakš źviazanych ź NISEPD», — adznačajecca ŭ zajavie Manajeva ad 1 žniŭnia.
«Jak robiacca padobnyja falsifikacyi ŭ krainie i za miažoj, daŭno i dobra viadoma pa nieźličonych «repartažach», «infarmacyjnych pieradačach», «analityčnych artykułach» i navat «filmach» (kštałtu niezabyŭnaha «Dzieci chłuśni»), zamoŭcami, a časam i aŭtarami jakich źjaŭlajucca pradstaŭniki ŭłady, pierš za ŭsio śpiecsłužbaŭ. Jak vybivajucca padobnyja «pryznańni», taksama dobra viadoma, — dastatkova nahadać prykłady masavych aryštaŭ i nastupnych publičnych «vykryćciaŭ» lidaraŭ apazicyi i navat kandydataŭ u prezidenty paśla vybaraŭ 19 śniežnia 2010 hoda. Tamu kamientavać, raźbirać «pa punktach» hety «śpiecyjalny repartaž» nie maje sensu», — ličyć sacyjołah.
Manajeŭ nahadvaje, što «represii biełaruskich uładaŭ suprać NISEPD majuć doŭhuju i «bahatuju «historyju», jakaja ŭklučaje publičnyja abvinavačvańni ŭ rabocie na zachodnija śpiecsłužby i ŭdziele ŭ «zmovach apazicyi suprać ułady», sfalsifikavanyja «vykryćci», pieratrusy KDB, sudovyja pracesy, zvalnieńni z pracy, kanfiskacyi, likvidacyi, vyhnańnie z krainy i navat aryšty».
«Likvidavaŭšy instytut rašeńniem Viarchoŭnaha suda ŭ krasaviku 2005 hoda, ułady vymusili zarehistravać jaho ŭ Litvie, a dziejnaść u Biełarusi faktyčna pieraviali na nielehalnaje stanovišča, — adznačaje zasnavalnik NISEPD. — Hałoŭnaja pryčyna hetaha zaklučajecca ŭ tym, što na praciahu amal čverci stahodździa NISEPD vykonvaŭ svaju misiju — pavyšać uzrovień kampietentnaści pryniaćcia rašeńniaŭ usimi palityčnymi subjektami, a taksama infarmavać biełarusaŭ ab ich mierkavańni pa najvažniejšych pytańniach hramadskaha raźvićcia».
«Va ŭmovach aŭtarytarnaha režymu instytut źjaŭlajecca adnym ź niamnohich krynic abjektyŭnaj, niepraduziataj infarmacyi ab tym, što nasamreč adbyvajecca ŭ Biełarusi. Kali kazać vobrazna, «lusterkam», u jakoje moža «hladziecca» i ŭłada, i apazicyja, i ŭsio hramadstva. U adroźnieńnie ad dziaržaŭnych słužbaŭ, NISEPD, niahledziačy na represii, zaŭsiody imknuŭsia zabiaśpiečyć maksimalny kantrol jakaści svaich daśledavańniaŭ, a taksama maksimalnuju adkrytaść ich vynikaŭ «, — padkreśliŭ Manajeŭ.
Na dumku sacyjołaha, čarhovaja sproba spynić dziejnaść NISEPD pradpryniataja nie vypadkova. «Miarkuju, hałoŭnaja pryčyna — chutkija parłamienckija vybary, dakładniej toje, što Jeŭrapiejski sajuz i ZŠA sfarmulavali ich praviadzieńnie ŭ adpaviednaści z demakratyčnymi normami ŭ jakaści hałoŭnaj umovy dalejšaha dyjałohu i palapšeńnia adnosin z Respublikaj Biełaruś (poŭnaha źniaćcia sankcyj, pradastaŭleńnia kredytaŭ i inš.)», — havorycca ŭ zajavie.
«Miarkujučy pa šmatlikich faktach, naprykład, nikčemna małym uklučeńni pradstaŭnikoŭ apazicyi ŭ vybarčyja kamisii, biełaruskija ŭłady nie źbirajucca mianiać praviły svajoj palityčnaj hulni, — ličyć Manajeŭ. — U toj ža čas va ŭmovach sacyjalna-ekanamičnaha kryzisu ŭ krainie, jaki ŭskładniajecca hieapalityčnaj abstanoŭkaj u rehijonie, jany vielmi zacikaŭlenyja ŭ «naładžvańni stasunkaŭ z Zachadam».
«Pakolki NISEPD na praciahu mnohich hadoŭ pravodzić postvybarčyja apytańni i šyroka raspaŭsiudžvaje ich vyniki (kolkaść publikacyj u ŚMI sa spasyłkami na jaho vyrasła z 25 u 1992 hodzie da 3.200 u 2015 hodzie), jakija značna razychodziacca z aficyjnymi vynikami, jahonaja dalejšaja dziejnaść ŭsprymajecca ŭładami jak pramaja pahroza svaim intaresam», — adznačaje sacyjołah.
«Zaklučny pasaž novaha» śpiecyjalnaha repartažu «Biełaruskaha telebačańnia pra toje, što «atrymanyja ŭ chodzie rasśledavańnia materyjały buduć pieradadzienyja ŭ pravaachoŭnyja orhany», a taksama namiok na «miedyjnaha ekskluziŭnaha atrymalnika infarmacyi ad NISEPD» kažuć pra toje, što ŭłady rychtujuć čarhovuju hučnuju «spravu» z metaj pazbavić biełaruskaje hramadstva i mižnarodnuju supolnaść abjektyŭnaj infarmacyi ab tym, što adbyvajecca ŭ našaj krainie, i ŭ kančatkovym vyniku praciahvać stary kurs u «novaj formie», — miarkuje zasnavalnik NISEPD.
Manajeŭ asabliva padkreślivaje: «Bolšaść supracoŭnikaŭ NISEPD, u tym liku i tyja, chto zajmajecca apytańniami hramadskaj dumki, źjaŭlajucca sapraŭdnymi prafiesijanałami i hodnymi ludźmi, pracavać ź jakimi zaŭsiody było honaram dla mianie. Va ŭniviersitetach i navukova-daśledčych arhanizacyjach mnohich krain śvietu, u jakich mnie daviałosia pracavać, jany karystalisia b zasłužanym aŭtarytetam i pavahaj. Ale im davodzicca pracavać va ŭmovach aŭtarytarnaj Biełarusi, mieć znosiny z žurnalistami dziaržaŭnych ŚMI i śledčymi pravaachoŭnych orhanaŭ pad pahrozaj kryminalnaha pieraśledu».
«Hałoŭnaja zadača ciapier — padtrymać hetych ludziej usimi dastupnymi sposabami. Navat kali pravodzić apytańni hramadskaj dumki va ŭmovach narastajučych represij stanie niemahčyma, NISEPD znojdzie inšyja formy praciahvać svaju dziejnaść i vykonvać svaju misiju», — zajaviŭ Aleh Manajeŭ.
NISEPD — najstarejšy ŭ Biełarusi niedziaržaŭny daśledčy centr, stvorany ŭ lutym 1992 hoda hrupaj vučonych, žurnalistaŭ, palitykaŭ i biznesmienaŭ. Asnoŭnymi vidami dziejnaści źjaŭlajucca: daśledavańni ŭ halinie sacyjałohii, ekanomiki i palitałohii; infarmacyjna-kansultatyŭnaja dziejnaść; praviadzieńnie kanfierencyj i sieminaraŭ; vydavieckaja dziejnaść; prafiesijny treninh. Vyniki apytańniaŭ NISEPD nieadnarazova padviarhalisia krytycy jak z boku ŭładaŭ, tak i z boku pradstaŭnikoŭ apazicyi. Da lipienia 2006 hoda NISEPD uznačalvaŭ jaho zasnavalnik, doktar sacyjałahičnych navuk prafiesar Aleh Manajeŭ. U krasaviku 2005 hoda instytut byŭ likvidavany pa rašeńni Viarchoŭnaha suda Biełarusi i paśla zarehistravany ŭ Litvie jak hramadskaja ŭstanova. Ciapier vykanaŭčym dyrektaram instytuta źjaŭlajecca doktar fiłasofii Alhirdas Dehucis.
Sacyjołah Nikaluk kamientuje rolik BT pra NISEPD: «Mianie hetaja fihnia nie cikavić»
