Stralanina ŭ Miunchienie: padrabiaznaści trahiedyi, viersii palicyi, reakcyja ŭładaŭ
U Miunchienie ŭ vyniku stralaniny ŭ adnym z handlovych centraŭ zahinuli 9 čałaviek i napadnik, 21 čałaviek atrymaŭ ranieńni.
Tut i nižej fota: Reuters
Uviečary ŭ piatnicu, 22 lipienia, u Alimpijskim handlovym centry ŭ Miunchienie była adkrytaja stralanina. Pavodle dadzienych palicyi, heta pačałosia kala restarana chutkaha charčavańnia, paźniej praciahnułasia ŭ handlovym centry. Infarmacyja ab stralbie ŭ centry horada, u rajonie Štachus nie paćvierdziłasia.
Palicyja paćvierdziła, što zahinuli 9 čałaviek, mierkavany złačyniec ździejśniŭ samahubstva. 21 čałaviek paranieny, ź ich troje ciažka, piša «Niamieckaja chvala».
Pavodle dadzienych palicyi, złačynstva ździejśniŭ adzin čałaviek. Mierkavany złačyniec — 18-hadovy niemiec iranskaha pachodžańnia, bolš za dva hady pražyvaŭ u Miunchienie. Raniej jon nie traplaŭ u pole zroku palicyi. Nieŭzabavie paśla pačatku stralaniny ŭ 17.50 hadzin jon byŭ lohka paranieny palicyjantami ŭ hramadzianskaj formie. Paźniej jamu ŭdałosia ŭciačy. Prykładna ŭ 20.30 pa miascovym časie złačyniec byŭ znojdzieny miortvym na adnoj z vulic, prylehłych da handlovaha centra. Pavodle dadzienych palicyi, jon ździejśniŭ samahubstva.
Jak paviedamiŭ načalnik palicejskaha kiravańnia Miunchiena Chubiertus Andre na pres-kanfierencyi nočču ŭ subotu, 23 lipienia, pieršapačatkovyja paviedamleńni ab troch udzielnikach stralby nie paćvierdzilisia. Taksama nie paćvierdziłasia infarmacyja, što złačyniec vykarystaŭ daŭhastvolnuju zbroju. Pobač ź im byŭ znojdzieny pistalet.
Pra matyvy i kantakty złačynca ŭ palicyi pakul niama nijakich dadzienych, zajaviŭ Chubiertus Andre.
Kiraŭnik viedamstva fiederalnaha kanclera Pieter Altmajer zajaviŭ, što nie vyklučaje terarystyčnaha charaktaru złačynstva ŭ Miunchienie. Śledčyja pracujuć u tym liku i ŭ hetym kirunku, adznačyŭ jon. Vice-kancler FRH Zihmar Habryel zaklikaŭ «nie śpiekulavać» pa śladach napadu ŭ Miunchienie. Kiraŭnik MZS FRH Frank-Valter Štajnmajer zajaviŭ, što matyvy złačynstva ŭ Miunchienie pakul zastajucca niavyśvietlenymi. «Dokazy dahetul supiarečlivyja», — havorycca ŭ zajavie ministra.
Na subotu, 24 lipienia, u Bierlinie pryznačanaje pasiadžeńnie ŭrada Hiermanii z udziełam kanclera Anhieły Mierkiel i ŭsich profilnych ministraŭ. U «kabiniet biaśpieki» ŭvachodziać ministry zamiežnych spraŭ, abarony, unutranych spraŭ i kiraŭnik viedamstva fiederalnaha kanclera.
Z-za złačynstva ŭ Miunchienie kiraŭnik MUS FRH Tomas de Mieźjer pierapyniŭ vizit u ZŠA, kudy jon adpraviŭsia ŭ adpačynak. Nieadkładna pa pryziamleńni ŭ Ńju-Jorku de Mieźjer rasparadziŭsia vylecieć nazad u Hiermaniju.
U suviazi sa stralboj ŭ handlovym centry ŭ Miunchienie było abvieščanaje asablivaje stanovišča. Z dapamohaj admysłovaj sistemy abviestki Katwarn haradžanie atrymali na smartfony paviedamleńnie z prośbaj nie pakidać svaje damy. Bavaryja źviarnułasia pa dapamohu da Fiederalnaj palicyi i inšych fiederalnych ziemlaŭ.
U horadzie byŭ całkam spynieny ruch haradskoha i pryharadnaha hramadskaha transpartu, zakryty i ačepleny hałoŭny čyhunačny vakzał. Palicyja zaklikała aŭtamabilistaŭ pakinuć aŭtabany blizu Miunchiena. U hadzinu nočy pa miascovym časie ŭ subotu hramadski transpart u horadzie adnaviŭ pracu.
Pa słovach Chubiertusa Andre, miunchienskaja palicyja, z punktu hledžańnia biaśpieki, nie bačyć nieabchodnaści dla admieny masavych mierapryjemstvaŭ, zapłanavanych u horadzie na vychadnyja dni.
