U Kijevie raźvitalisia z Paŭłam Šaramietam
U Kijevie raźvitalisia z Paŭłam Šaramietam. Žałobnaja cyrymonija prajšła ŭ centry «Ukrainski dom». Na cyrymonii prysutničaŭ prezident Ukrainy Piatro Parašenka.
Raźvitańnie z zahinułym žurnalistam doŭžyłasia z 11.00 da 14.00. Paśla hetaha trunu ź ciełam Paŭła pahruzili ŭ katafałk. Siońnia viečaram jaje dastaviać samalotam u Minsk i źmieściać u chram Usich Śviatych (vuł. Kalinoŭskaha, 121). 23 lipienia z 11.00 da 14.00 tut płanujecca cyrymonija raźvitańnia. Pachavajuć Šaramieta na Paŭnočnych mohiłkach pobač ź jaho baćkam, piša BiełaPAN.
Jak paviedamlaje Radyjo Svaboda, spačuvańni rodnym i blizkim Šaramieta vykazali vyšejšyja asoby dziaržaŭ, kiraŭniki źniešniepalityčnych viedamstvaŭ, mižnarodnyja arhanizacyi. Biełaruskaje kiraŭnictva ad lubych acenak taho, što adbyłosia, ustrymlivajecca.
Tym časam u Kijevie śledčaja hrupa praciahvaje pracavać z aŭtamabilem, u jakim žurnalist jechaŭ u momant vybuchu, vyvučajucca videa z kamier nazirańnia, paviedamlajuć ukrainskija ŚMI. Na adnym z zapisaŭ, pavodle najaŭnaj infarmacyi, zafiksavany momant zakładki vybuchovaha prystasavańnia. Jak paviedamiła žurnalistam krynica ŭ pravaachoŭnych orhanach, ustanoŭlena, što metaj vybuchu byŭ mienavita Pavieł Šaramiet.
Da rasśledavańnia padklučylisia supracoŭniki FBR, ab dapamozie jakich paprasili ŭkrainskija ŭłady. 21 lipienia jany sustrelisia z kiraŭnictvam Nacyjanalnaj palicyi Ukrainy.
Deputat Viarchoŭnaj rady, člen kalehii MUS Ukrainy Anton Hieraščanka paviedamiŭ ŚMI, što ŭkrainskija pravaachoŭniki chočuć atrymać dostup da ŭsioj pierapiski Šaramieta za apošni čas. Dla hetaha jany majuć namier źviarnucca z zapytami ŭ Google i Facebook. Akramia taho, pravaachoŭniki analizujuć telefonny trafik zahinułaha.
Žurnalist biełaruskaha pachodžańnia Pavieł Šaramiet, jaki apošnija piać hadoŭ žyŭ i pracavaŭ va Ukrainie, zahinuŭ u Kijevie ranicaj 20 lipienia ŭ vyniku padryvu mašyny. Vybuch zdaryŭsia ŭ 7.45 na rahu vulicy Bahdana Chmialnickaha i Ivana Franka, nasuprać restarana McDonalds. Šaramiet paśpieŭ prajechać niekalki dziasiatkaŭ mietraŭ. Mašyna naležała suzasnavalnicy vydańnia «Ukrainskaja pravda» Alenie Prytuła, adnak jaje ŭ aŭtamabili nie było. Pavodle infarmacyi pravaachoŭnikaŭ, spracavała vybuchoŭka mahutnaściu 400—600 h u tratyłavym ekvivalencie.
Nacyjanalnaja palicyja Ukrainy raspačała pa fakcie hibieli žurnalista kryminalnuju spravu na padstavie artykuła «Naŭmysnaje zabojstva». Jak paviedamiŭ viečaram 20 lipienia daradca kiraŭnika Słužby biaśpieki Ukrainy Juryj Tandyt, pravaachoŭnyja orhany raspracoŭvajuć čatyry viersii zabojstva: prafiesijnaja dziejnaść, niepryjaznaść ŭ adnosinach abo asabistyja matyvy, ruski śled (destabilizacyja situacyi) i zamach na Alenu Prytułu. «Dla nas raskryćcio hetaha złačynstva ź`iaŭlajecca pryncypovym», — padkreśliŭ Tandyt. Jon taksama adznačyŭ, što, zhodna z papiarednimi źviestkami, vykarystoŭvałasia vybuchovaje prystasavańnie z dystancyjnym kiravańniem, prymacavanaje pad siadzieńniem kiroŭcy.
Paŭłu Šaramietu było 44 hady.
