AHP patrabuje adstaŭki Łukašenki i jaho ŭrada
Abjadnanaja hramadzianskaja partyja patrabuje adstaŭki Alaksandra Łukašenki i jahonaha ŭrada, što źjaŭlajecca nieabchodnaj umovaj dla reformaŭ i raźvićcia Biełarusi. Pra heta havorycca ŭ zajavie, pryniataj delehatami XVII spravazdačna-vybarčaha źjezdu partyi 17 lipienia ŭ Minsku.
Biełaruś znachodzicca ŭ stanie pastajannaha kryzisu, adznačajecca ŭ dakumiencie. Pryčym adkaznaść za heta, ličać u AHP, «całkam lažyć na dziejučaj uładzie». «Čynoŭniki skancentravali ŭ svaich rukach naŭprosty kantrol nad 80% resursaŭ i aktyvaŭ krainy. Praź ich ruki prachodzić amal pałova VUP krainy. Jany pieratvaryli biełarusaŭ z ułaśnikaŭ u arandataraŭ ułasnaj ziamli, damoŭ i budučyni. Jany «kašmarać» pradprymalnikaŭ, dušać vytvorcaŭ i ździekujucca ź inviestaraŭ», - havorycca ŭ zajavie.
«Za što b ni brałasia ŭładnaja viertykal, - padkreślivajecca ŭ dakumiencie, - vychchodziła z dakładnaściu da naadvarot: Biełaruś stała najhoršaj krainaj śvietu pa roście cenaŭ, biełaruski rubiel uvajšoŭ u dziasiatku samich niestabilnych hrošaj u śviecie, atrymali rost impartu, karupcyju ŭ dziaržaŭnych prahramach i padzieńnie jakaści tavaraŭ, daviali bolšaść piensijanieraŭ da piensii krychu bolš za 100 dalaraŭ i inšaje».
Łukašenka, urad, pryznačanyja deputaty, ličać u AHP, niasuć «naŭprostuju adkaznaść za sistemny, strukturny i sacyjalny kryzis».
Partyja bačyć siem bazavych pryčyn dla adstaŭki Łukašenki i jaho ŭrada:
- Niazdolnaść navukova i prafiesijna stavić dyjahnaz kryzisu;
- Deindustryjalizacyja, daviadzieńnie tysiač pradpryjemstvaŭ da bankructva;
- Adchileńnie zvyčajnych biełarusaŭ ad kiravańnia ziamloj, aktyvami, resursami i majomaściu;
- Pieratvareńnie dziasiatkaŭ haradoŭ u zony vytvorčaha, majomasnaha i inviestycyjnaha niaščaścia;
- Pryhon duchu nacyjanalnaha pradprymalnictva;
- Niazdolnaść adkryć dla biełaruskich vytvorcaŭ rynki krain Jeŭrapiejskaha sajuza, Azii, ZŠA, a taksama realizavać svabodu pieramiaščeńnia tavaraŭ u ramkach JEAES;
- Pravał reformaŭ infrastrukturnych siektaraŭ ekanomiki - enierhietyki, ciepłazabieśpiačeńnia, vodazabieśpiačeńnia, transpartu i telekamunikacyi.
