Novy Apostalski nuncyj atrymaŭ biskupskaje paśviačeńnie; mitrapalit Kandrusievič raspavioŭ jamu pra apošnija «tryvožnyja padziei ŭ kaściole»
magyarkurir.hu
15 lipienia ŭ katedralnym kaściole Uniebaŭziaćcia Najśviaciejšaj Panny Maryi i archanioła Michała ŭ h. Vac (Vienhryja) adbyłosia biskupskaje paśviačeńnie mansieńjora Habara Pintera, jakoha Papa Francišak pryznačyŭ Apostalskim Nuncyjem u Biełarusi. Arcybiskup Pinter staŭ pieršym vienhierskim Nuncyjem u historyi.
Hałoŭnym paśviačajučym byŭ Dziaržaŭny Sakratar Papy Franciška kardynał Pjetra Paralin, asistavaŭ — Prymas Vienhryi kardynał Peter Erdzio i ardynaryj dyjacezii Vac biskup Mikłaš Bejer. Biełaruś pradstaŭlali Mitrapalit Minska-Mahiloŭski arcybiskup Tadevuš Kandrusievič i biskup Pinski Antoni Dziamjanka.
Va ŭračystaj Imšy prymaŭ udzieł taksama arcybiskup Vieny kardynał Krystaf Šonbarn, jaki dva tydni tamu ŭ jakaści papskaha lehata ŭznačaliŭ jubilejnyja ŭračystaści 25-hodździa ŭstanaŭleńnia Minska-Mahiloŭskaj mitrapolii.
Usiaho ŭ Imšy ŭdzielničali 25 biskupaŭ, siarod jakich ijerarchi Vienhryi, u tym liku hreka-katalicki jepiskap, pradstaŭniki jepiskapataŭ Aŭstryi, Sierbii, Słavienii, Charvatyi, Biełarusi, a taksama kala 100 śviataroŭ. Byli prysutnyja pravasłaŭny archijepiskap Vieny i Budapiešta Sierbskaha Patryjarchatu, vice-premjer Vienhryi i parłamientaryi.
Šmat uvahi kardynał Pjetra Paralin pryśviaciŭ zadańniam Nuncyja jak pradstaŭnika Śviatoha Ajca, jaki pavinien dapamahać miascovamu Kaściołu ŭ vykanańni jaho niepasrednaj funkcyi vieści ludziej šlacham zbaŭleńnia, a taksama raźvivać adnosiny pamiž Apostalskim Pasadam i kankretnaj krainaj, u dadzienym vypadku ź Biełaruśsiu. Kardynał padkreśliŭ, što mansieńjor Habar Pinter budzie słužyć u Biełarusi, dzie Kaścioł 25 hadoŭ tamu atrymaŭ svabodu i dzie hety Kaścioł žyvy, mužna śviedčyŭ i praciahvaje śviedčyć svaju vieru.
Biskupskaje paśviačeńnie novaha Nuncyja, pryznačanaha ŭ Biełaruś, stała dobraj akazijaj dla Mitrapalita Tadevuša Kandrusieviča sustrecca z mnohimi ijerarchami. Kardynał Krystaf Šonbarn paviedamiŭ biełaruskamu arcypastyru, što dva dni tamu pieradaŭ Śviatomu Ajcu rapart ab uračystaściach jubileju 25-hodździa zasnavańnia Minska-Mahiloŭskaj mitrapolii. Taksama kardynał skazaŭ Pantyfiku, što katoliki Biełarusi čakajuć jaho.
U adkaz Papa ŭzhadaŭ vizit Alaksandra Łukašenki ŭ Vatykan. Akramia taho, kardynał Šonbarn ź vialikim entuzijazmam raspavioŭ inšym biskupam ab budsłaŭskich uračystaściach, padkreślivajučy, što ŭ ich prymała ŭdzieł 30 tysiač viernikaŭ.
Mitrapalit Tadevuš Kandrusievič padčas sustrečy ź Dziaržaŭnym Sakratarom Papy kardynałam Pjetro Paralinam i novapryznačanym Apostalskim Nuncyjem arcybiskupam Habaram Pinteram paznajomiŭ ich z apošnimi tryvožnymi padziejami ŭ žyćci Kaścioła ŭ Biełarusi, jakija, jak dadaŭ ijerarch, na ščaście, paśpiachova vyrašylisia.
Arcybiskup Habar Pinter prybudzie ŭ Biełaruś u siaredzinie žniŭnia.
