VUP Irłandyi vyras na rekordnyja 26%
Ułady Irłandyi pierahledzieli acenku pa roście VUP krainy za 2015 hod. Novyja dadzienyja adroźnivajucca ad raniejšych u 3 razy. Vychad ekanomiki Irłandyi na takija pakazčyki źviazvajuć ź pieranosam u hetuju krainu štab-kvater bujnych karparacyj.
AFP
Za 2016 hod VUP Irłandyi vyras na 26,3%, paviedamlaje Centralnaje ŭpraŭleńnie statystyki (CUS) hetaj krainy. Pa abnoŭlenych źviestkach viedamstva, u 2015 hodzie abjom VUP Irłandyi skłaŭ €243,914 młrd (u cenach 2014 hodu) suprać €193,16 młrd hodam raniej.
Raniej ličyłasia, što za ŭvieś 2015 hod ekanomika Irłandyi vyrasła tolki na 7,8%, što taksama było lepšym pakazčykam siarod krain ES.
Pryrost VUP krain jeŭrazony, da prykładu, skłaŭ tolki 1,6%.
U spravazdačy viedamstva adznačajecca, što najbolš istotny ŭkład u rost VUP zrabili pramysłovaść i budaŭničaja śfiera. Vartasny abjom ich vytvorčaści, pa dadzienych CUS, u 2015 hodzie vyras na 87,3% — z € 46,525 młrd da € 87,144 młrd. U astatnich siektarach ekanomiki Irłandyi pryrost apynuŭsia ŭ razy ściplejšym. Tak, naprykład, pakazčyki sielskaj haspadarki palepšylisia tolki na 10,3% (da € 4,585 młrd).
Ekśpierty źviazvajuć rezki rost VUP Irłandyi ź pieranosam u hetuju krainu štab-kvater bujnych mižnarodnych karparacyj, pryciahnutych nizkimi staŭkami padatku na prybytak. Kali štab-kvatera bujnoj hrupy kampanij atrymlivaje status rezidenta, uvieś prybytak takoj hrupy ŭklučajecca ŭ vałavy nacyjanalny dachod.
«My vielmi maleńkaja ekanomika, i voś što zdarajecca, kali my atrymlivajem vialikaje pavieličeńnie aktyvaŭ», - rastłumačyŭ Bloomberg pradstaŭnik CUS Majkł Konali.
U paviedamleńni irłandskaha Minfina adznačajecca, što novyja dadzienyja ab roście VUP palepšać i inšyja makraekanamičnyja pakazčyki Irłandyi. U pryvatnaści, deficyt biudžetu skarocicca da 1,9% VUP, a ŭzrovień dziarždoŭhu — da 79% VUP.
Pryrost VUP Irłandyi akazaŭsia samym vysokim z zafiksavanych u 2015 hodzie va ŭsim śviecie. Pa dadzienych Mižnarodnaha valutnaha fondu (MVF), bolšy čym 10-pracentny pryrost ekanomiki ŭ minułym hodzie pakazała tolki Efiopija (+ 10,2%), a VUP Pałaŭ i Papua Novaj Hviniei vyraśli na 9,4 i 9% adpaviedna.
Pry hetym VUP ZŠA ŭ 2015 hodzie vyras na 2,4%, Hiermanii - na 1,5%, Vialikabrytanii - na 2,2%, Japonii - na 0,5%, Kitaja - na 6,9%, a VUP Biełarusi źniziŭsia na 3,9% da 869,7 trłn niedenaminavanych rubloŭ (kala 42,8 młrd jeŭra pa stanie na 1 studzienia 2016).
