U fihurantaŭ «spravy prafiesaraŭ BNTU» kanfiskujuć kvateru, čatyry aŭto i dva noŭtbuki
12 lipienia ŭ Minskim haradskim sudzie abvieščany pryhavor pa tak zvanaj spravie prafiesaraŭ Biełaruskaha nacyjanalnaha techničnaha ŭniviersiteta (BNTU).
Sud pahadziŭsia z pazicyjaj dziaržabvinavaŭcy i pryhavaryŭ Alaksandra Čyčko da čatyroch hadoŭ pazbaŭleńnia voli, Uładzimira Sobaleva — da troch hadoŭ i šaści miesiacaŭ pazbaŭleńnia voli, Volhu Čyčko — da troch hadoŭ pazbaŭleńnia voli i ŭsim pryznačyŭ kanfiskacyju majomaści, pazbaviŭ ich prava vykonvać arhanizacyjna-rasparadčyja funkcyi terminam na piać hadoŭ.
Da ŭsich abvinavačanych prymienienaja adterminoŭka vykanańnia asnoŭnaha pakarańnia terminam na dva hady, aryštavanuju majomaść fihurantaŭ pastanoŭlena źviarnuć ŭ dachod dziaržavy.
Abvinavačvańnie śćviardžała, što fihuranty nasupierak intaresam słužby, z karyślivaj i inšaj asabistaj zacikaŭlenaści, majučy mety karjeryzmu, žadajučy zarekamiendavać siabie paśpiachovymi navukoŭcami, złoŭžyli svaimi słužbovymi paŭnamoctvami, arhanizavaŭšy pracu, raźmierkavańnie ŭznaharodžańnia členam časovych navukovych kalektyvaŭ, składańnie spravazdačnych materyjałaŭ, a taksama rehistracyju kampjutarnych prahram na fizičnych asob z parušeńniem standartaŭ zakonnaści. Hetyja dziejańni nibyta paciahnuli parušeńnie vyklučnaha prava ŭłasnaści BNTU na vyniki navukova-daśledčych rabot, a taksama ciažkija nastupstvy ŭ vyhladzie niametavaha vykarystańnia vydatkavanych dziaržavaj finansavych resursaŭ u asabliva bujnym pamiery — bolš za 176 młn. rubloŭ. Pry hetym dla stvareńnia bačnaści vykananych rabot i abhruntavanaści vypłaty ŭznaharody słužbovymi asobami nieadnarazova falsifikavalisia spravazdačnyja materyjały. Jak śćviardžaŭ dziaržabvinavaŭca, spravazdačy ab rabotach, vykananych u roznyja hady dla roznych zakazčykaŭ, dublujucca prykładna na 85%.
Nichto z abvinavačanych viny nie pryznaŭ. Advakaty padčas sprečak abviarhali ŭsie vyłučanyja suprać padabaronnych abvinavačańni.
Śledstva pa hetaj spravie doŭžyłasia kala troch hadoŭ. Sudovy praces praciahvaŭsia paŭhoda.
Pryhavor Minskaha haradskoha suda moža być abskardžany.
