Futbalist «Ašmianaŭ» udaryŭ nahami ŭ hrudzi supracoŭniku śpiecpadraździaleńnia — viersija MUS
Raniej 23-hadovy futbalist Siarhiej Bułynianok raspavioŭ, što 2 lipienia jaho źbili paśla matča 11-ha tura pieršaj lihi čempijanatu Biełarusi pamiž kamandami «Ašmiany» — «Pramień» (Minsk).
Jak patłumačyli ŭ pres-słužbie MUS, u hety dzień paśla hulni ŭ Ašmianach pravodzilisia zatrymańni pa padazreńni ŭ arhanizacyi damoŭlenaha matča. Pry hetym piać ŭdzielnikaŭ hulni, jakija, na dumku apieratyŭnikaŭ, mahli mieć dačynieńnie albo viedać pra toje, što matč damoŭleny, pasprabavali ŭciačy. Jany nakiravalisia na aŭtamabili ŭ bok Minska. Supracoŭniki milicyi vyrašyli pačać pieraśled.
Na trasie Ašmiany — Minsk paśla spynieńnia mašyny supracoŭniki milicyi ŭ cyvilnym adzieńni abviaścili ŭciekačam, čamu ich spynili, i pakazali słužbovaje paśviedčańnie. Čaćviora vykanali patrabavańni supracoŭnikaŭ milicyi i vyjšli z aŭtamabila.
Adnak, jak adznačaje MUS, futbalist FK «Ašmiany» Siarhiej Bułynianok admoviŭsia vyjści z mašyny.
U paviedamleńni havorycca, što jon adchiliŭsia na zadnim siadzieńni aŭtamabila i niekalki razoŭ udaryŭ nahami ŭ hrudzi supracoŭniku śpiecpadraździaleńnia. Tamu da jaho ŭžyli fizičnuju siłu. Paśla razboru ŭ pamiaškańni Hałoŭnaha ŭpraŭleńnia pa baraćbie z arhanizavanaj złačynnaściu MUS jaho adpuścili. Fizičny stan Siarhieja, jaki sam nie vykazvaŭ pretenzij, nie vyklikaŭ zaniepakojenaści ŭ supracoŭnikaŭ milicyi.
Ciapier praviarajecca dačynieńnie futbalista da mahčymaj arhanizacyi damoŭnych matčaŭ. Dziejańniam Bułynianka ŭ supracivie milicyi daduć pravavuju acenku. Ustanaŭlivajucca inšyja fihuranty kryminalnaj spravy.
