U centry Minska insceniravali hučnaje DTZ z udziełam matacyklista i daišnika FOTY
Ranicaj 1 lipienia na pierakryžavańni praśpiektaŭ Niezaležnaści i Mašerava śledčyja «insceniravali» padziei rezanansnaha zdareńnia.
Samo DTZ adbyłosia 18 krasavika. Na rahu dvuch praśpiektaŭ daišnik padyjšoŭ da bajkiera na spartovym matacykle, jaki stajaŭ na čyrvonaje śviatło, i zapatrabavaŭ pakazać dakumienty. Nahodaj stała adstutnaść na matacykle rehistracyjnych znakaŭ.
Što adbyłosia dalej, dakładna nieviadoma. Vidavočcy kazali, što matacyklist rezka startanuŭ ź miesca, a inśpiektar schapiŭsia za styrno. Milicyja śćviardžaje, što matacyklist začapiŭ inśpiektara i paciahnuŭ za saboj. Matacyklist zajaŭlaŭ, što daišnik rezka schapiŭ jaho za ruku i jon vypadkova nacisnuŭ na haz.
Tym časam zaharełasia zialonaje śviatło dla aŭtamabilaŭ, jakija jechali pa praśpiekcie Niezaležnaści. Aŭtamabil ź inkasatarami nie bačyŭ matacyklista ź inśpiektaram. Adbyłosia sutyknieńnie, u jakim ciažka paciarpieŭ daišnik.
Pa słovach vidavočcaŭ, druhi inśpiektar z ekipaža apieratyŭna pierakryŭ ruch na praśpiekcie i spyniŭ chutkuju. Miedyki i vidavočcy akazvali paciarpiełamu inśpiektaru dapamohu na miescy, ale ŭ prytomnaść jon tak i nie pryjšoŭ.
I voś 1 lipienia śledčyja praviali ekśpierymient pa hetym DTZ. Byŭ vykarystany spartovy matacykł toj ža madeli i toj ža kanfihuracyi – na ručkach u jaho admysłovyja pryłady, jakija pavinny abaraniać ad vypadkovaha naciskańnia.
Taksama pryhnali tuju samuju inkasatarskuju mašynu.
«U rekanstrukcyi padziej uziali ŭdzieł śledčyja, u tym liku i śledčy, jaki viadzie spravu pa DTZ, supracoŭniki DAI i pradstaŭniki bajkierskaha kłubu», — paviedamiła Julija Hančarova, aficyjny pradstaŭnik Śledčaha kamiteta.
Bajkiery vykonvali rolu paniatych i statystaŭ – to bok adzin ź ich hraŭ rolu taho samaha matacyklista. Za styrnom inkasatarskaj mašyny byŭ toj ža kiroŭca, što i ŭ dzień DTZ.
Rekanstrukcyja padziej pravodziłasia na asnovie pakazańniaŭ udzielnikaŭ DTZ i videa z kamier nazirańnia i rehistrataraŭ.
«Da materyjałaŭ kryminalnaj spravy dałučyli niekalki frahmientaŭ videazapisaŭ, u tym liku i ź videarehistratara ekipaža DAI. Z pazicyi śledstva pakul što abnarodavać hetyja zapisy niemetazhodna, kab paźbiehnuć roznych traktovak i vypracoŭki viersij jak bokam abarony, tak i abvinavačvańnia», — skazała Julija Hančarova.
Julija Hančarova.
Ale dla bolš dakładnaj rekanstrukcyi pierad pačatkam ekśpierymientu paniatym pakazali videa.
Asnoŭnyja mety ekśpierymientu – vyznačyć trajektoryju ruchu matacykła i daviedacca, ci moh daišnik sapraŭdy šturchanuć pravuju ruku matacyklista tak, kab jana vypadkova vycisnuła ručku hazu.
Ani paciarpieły inśpiektar, ani abvinavačvany matacyklist u śledčym ekśpierymiencie ŭdzieł nie brali.
46-hadovy inśpiektar DAI jašče ŭ balnicy. Mužčyna ŭžo pryjšoŭ u prytomnaść, ale pakazańni pakul nie davaŭ. Jamu zrabili niekalki apieracyj, u tym liku i trepanacyju čerapa, paŭtara miesiaca jon byŭ u komie. Dapytać inśpiektara pakul niemahčyma, jaho stan zdaroŭja nie dazvalaje heta zrabić — jon pakul nie moža havaryć.
Padazravany, 31-hadovy ŭradženiec Žłobina, znachodzicca ŭ SIZA. Viadoma, što jon mieŭ 52 parušeńni PDR da zdareńnia. A ciapier jamu pahražaje da 5 hadoŭ źniavoleńnia.
Vyniki śledčaha ekśpierymienta abiacajuć ahučyć u najbližejšy čas.
