Biełarus choča adkryć fiermu cvyrkunoŭ i prapanuje ŭžyvać ich u ježu FOTA
Cvyrkuny – novaja halina biznesu pa ŭsim śviecie. Ich vykarystoŭvajuć u jakaści karmoŭ, a adchody — u jakaści ŭhnajeńniaŭ.
Novym trendam u takim «ahrabiznesie» stała ŭžyvańnie ich u ježu. Užo siońnia ŭ Jeŭropie i ZŠA možna pabačyć muku i batončyki z cvyrkunoŭ. Siarhiej Makaraŭ treci hod vyroščvaje hetych nasiakomych, a taksama płanuje adkryć cełuju fiermu.
«Ja paŭtara hoda pracavaŭ va Ukrainie na telebačańni. Vypadkova adnojčy pahladzieŭ pa Discovery prahramu «Dirty Jobs» («Brudnaja praca»). I tam u adnoj ź sieryj raspaviadali pra fiermu cvyrkunoŭ. I mianie tak natchniła hetaja pieradača, što ja prosta pajšoŭ dy nabyŭ piać cvyrkunoŭ. Viadoma ž, u mianie adrazu ničoha nie atrymałasia i jany pamierli praz try dni. Z časam ja pačaŭ budavać śpiecyjalnyja inkubatary, utrymlivać nasiakomych u śpiecyjalnych tempieraturnych umovach i pravilna karmić ich. Pakolki ja žyŭ z žonkaj i dziciom, ja zachoŭvaŭ ich u baćkoŭskim domie ŭ svaim pakoi. Maci była ŭ šoku, bo jany razmnožylisia i pačali poŭzać pa ŭsioj kvatery. Siońnia jany tam i žyvuć, ale ja za imi saču i, pakolki nie maju patrebnych dakumientaŭ, prosta razdaju ich usim achvotnym».
Važnyja cvyrkuny
Jość vialikaja kolkaść cvyrkunoŭ, ale razvodziać try vidy: bananavyja, chatnija i čornyja-dvuchplamistyja. Ja haduju bananavych, bo jany nikoli i ničym nie chvarejuć. Siońnia ich vykarystoŭvajuć dzie tolki možna.
Naprykład, cvyrkuny nadzvyčaj papularnyja ŭ rybakoŭ. 80% amierykanskich fiermaŭ, jakija vyrablajuć hetych nasiakomych, handlujuć u śfiery rybałoŭstva. U nas ža raniej łavili na konikaŭ, ale ž cvyrkuny lepšyja! Samy hałoŭny plus – jany vialikija i z kryłami, tamu imi dobra budzie łavić na nachłyst.
Taksama ich jaduć ekzatyčnyja žyvioły nakštałt pavukoŭ, jaščarak.
Narešcie – cvyrkunovy pamiot. Jon najlepšy pa azotnaj nasyčanaści. Taksama cvyrkunoŭ pieramołvajuć na kambikorm dla pierapiołak i cacarak. Ale mnie bolš padabajecca tema z ŭžyvańniem cvyrkunoŭ u ježu. Heta žyviolny białok, nul tłušču i ŭvohule dobry anałah spartyŭnaha charčavańnia. Tolki ŭ cvyrkunovaj muce ŭtrymlivajucca ŭnikalnyja aminakisłoty. Taksama ŭ ich składzie prysutničaje vielmi važny vitamin B12, razam z kampanientami, ź jakimi dobra zasvojvajecca. Hatavać ich vielmi prosta. Dastatkova prosta niekalki dzion patrymać ich bieź ježy, a paśla prosta smažyć ci pravieści termičnuju apracoŭku. Bolš ničoha nie treba, bo ŭ mianie jany znachodziacca ŭ sterylnych umovach.
Vyhadny biznes
Ja viadu pieramovy pra biznes u Biełarusi. Ale dla ŭsich heta novy rynak i nichto nie bačyć u hetym pierśpiektyvy. U adnoj ź firm mnie ŭvohule skazali, što kali jany zrobiać, naprykład, partyju prateinavych batončykaŭ z cvyrkunoŭ, to paśla im daviadziecca vykinuć usio abstalavańnie. Ale, pa sutnaści, tam niama ničoha brydkaha – cvyrkunovaja muka, arechi, miod i astatnija naturalnyja kampanienty. U Jeŭropie ŭžo isnuje fierma dla hadavańnia cvyrkunoŭ dla restaranaŭ, u Finlandyi chłopcy robiać batončyki ź ich. U nas na rynku zaraz adzin cvyrkun kaštuje kala 0,1 rubla. Na porcyju korma dla taho ž chamieleona nabyvajuć 100 cvyrkunoŭ na tydzień, dla pavuka – 10. Žyvuć jany niadoŭha – 2 miesiacy. Praź miesiac paśla naradžeńnia samki z samcami sparvajucca i samka adkładaje jajki. Karmić taksama prosta – na 10 tysiač cvyrkunoŭ treba pačak aŭsianki, try pački hamarusa (białok, kaštuje 18 tysiač za pačak), 2 kh muki i litr vady. Nu i padtrymlivać tempieraturu +24 hradusy i patrebnuju vilhotnaść. Pry hetym adna samka ŭ siarednim adkładaje 200 jajek z vyžyvalnaściu 90%.
Pra rehistracyju
Sprava ŭ tym, što z takim biznesam nierealna prajści ni adnu sanstancyju. Jość praviła, pavodle jakoha nie pavinna być nijakich nasiakomych, i na im maja fierma «pravalvajecca». To bok kali ja napišu pra metavaje pryznačeńnie pamiaškańnia, to budzie tak: «Cvyrkunovaja fierma. Što razvodzicie? Nasiakomych. Da pabačeńnia!» Ale mnie telefanujuć šmat ludziej, popyt jość. Ale ja nie mahu pradavać, bo niezarehistravany. Tolki sioleta ŭ nas adkryłasia mahčymaść razvodzić nasiakomych i płacić padatak prykładna jak pčałavody. Ale sanstancyja papravak nie ŭnosiła, tamu adkryć ja ničoha nie mahu, bo pakul usich daviedak nie atrymaješ, ciabie nie aformiać u padatkavoj.
Pra fiermu
Ja zapuściŭ kraŭdfandyh na ulej.by, ale bačna, što ideja dla Biełarusi troški nierealnaja. Zaraz ja razmaŭlaju z našym minskim zaaparkam. Ja źbirajusia adkryć tam fiermu, dzie spačatku budu rabić korm dla žyvioł. Ja vyrašyŭ abrać terytoryju zaaparku, bo tam ja zmahu raźvivacca. Tam možna budzie zrabić i roznyja rečy dla rybałoŭstva, uhnajeńni, ježu dla ludziej… Z cvyrkunoŭ ža možna rabić i suvieniry — naprykład, zalivać u płastyk. Čakaju adkazu i spadziajusia, što spravy pojduć uharu.
