U Łojevie zatrymany žurnalist-fryłansier Kastuś Žukoŭski
U Łojevie 21 červienia zatrymany žurnalist-fryłansier Kastuś Žukoŭski.
Jon paviedamiŭ, što zatrymańnie rabiła kiraŭnictva miascovaha adździeła ŭnutranych spraŭ.
«My zdymali cahlany zavod, na jakim ciažkaje ekanamičnaje stanovišča, ludzi atrymlivajuć kapiejki, pracy inšaj u rajcentry niama. Pryjechała milicyja, mianie i kalehu Alaksieja brutalna zatrymali, dastavili ŭ adździeł, u dziažurnuju čaść. Aparaturu — videakamieru — vychapili z ruk i, chutčej za ŭsio, złamali. Mianie ŭ dziažurnaj čaści zvalili na padłohu, nadzieli kajdanki, stanavilisia nahoj na hałavu, pryčym heta rabiŭ čałaviek, jaki nazvaŭsia namieśnikam načalnika RAUS Hienadziem Madžaram», — raskazaŭ pa telefonie Žukoŭski.
Pavodle jaho słoŭ, u jaho padniaŭsia cisk, jamu vyklikali chutkuju dapamohu. «Mnie zrabili ŭkoły, i ciapier ja ŭ milicyi — składajuć pratakoł, pakul nieviadoma, za što mienavita», — dadaŭ žurnalist.
U Łojeŭskim RAUS pakul nie kamientujuć zdareńnie. «Vam pieratelefanujuć», — paabiacaŭ dziažurny adździeła.
