Čamu ŭ Minsku vysiakajuć drevy, choć «Zielanbud» maje mašynu dla ich pierasadki
«Pa viaśnie mašynu brali ŭ arendu, a ciapier staić», — tak u «Zielanbudzie» havorać pra mašynu dla pierasadki dreŭ «Apcimał». Jaje vykarystoŭvali padčas budaŭnictva žyłoha rajona «Novaja Baravaja».
Fota wildlife.by
Tady pierasadzili 25-hadovy dub. Dreva pryžyłasia i ciapier raduje miascovych žycharoŭ.
«Mašyna ŭ asnoŭnym vykarystoŭvajecca ŭviesnu i ŭvosień, zaležyć ad zamovaŭ. Stohadovuju tapolu nie pierasadziać. A voś drevy 20-30 hadoŭ pieranieści možna», — raspaviadajuć pra cud techniki ŭ filijale «Minskzielanbuda» «Broŭki». Mienavita ŭ ich, u Minskim rajonie, staić mašyna pa pierasadcy «Apcimał».
Ciapier jaje nie vykarystoŭvajuć: adna hadzina pracy mašyny kaštuje 354 tysiačy ŭ budni i 409 tysiač u vychadnyja plus daroha. Vysiekčy dreva značna daražej: 1,1 miljona, kali dyjamietr mienšy za 30 santymietraŭ. Daražej za pierasadku bolš čym u try razy!
Ale čamu mašynu nie vykarystoŭvajuć, kab paźbiehnuć kanfliktaŭ z haradžanami i zachavać raślinnaść, tym bolš kali heta kaštuje tańniej?
Akazvajecca, vysiečka vyhadniejšaja: zakazčyk atrymoŭvaje čystuju placoŭku, dzie moža jeździć technika, a padradčyk — bolš hrošaj za pracu.
«Arhanizacyi vyhadna zarabić, tym bolš kali jana nie finansujecca ź biudžetu. Našmat vyhadniej dla vykanaŭcy vysiekčy drevy. Arhanizacyja budaŭničaj placoŭki — heta taksama srodki. I tut stavicca zadača minimizacyi raschodaŭ. Stavicca zadača, kab było zručna pracoŭnym, kab ekanomić bienzin. Tut usio zaležyć ad śviadomaści zabudoŭščyka», — tłumačyć «haradski laśničy» Ihar Korzun.
Atrymlivajecca, što zachavańnie dreŭ — usio adno lišnija traty dla zabudoŭščyka. Ale kali budučyja pakupniki žylla zachočuć zialony rajon i hatovyja za heta pierapłacić, pieraškodaŭ niama:
Možna zamović prajekt z zachavańniem dreŭ, źviarnuŭšysia da tych, chto drevy pierasadzić (na siońnia ŭ Minsku dźvie mašyny dla pierasadki).