Top-10 samych darahich damoŭ i kvater, jakija pradajucca ŭ Minsku
U lutym ministr budaŭnictva i architektury Biełarusi Anatol Čorny ŭ efiry telekanała «Biełaruś-1» zajaviŭ: «Rynak budzie padać. Elitnaje žyllo pavinna padciahvacca i skidać canu, kab znajści svajho kupca». «Naša Niva» vyrašyła pacikavicca, kolki siońnia treba addać za «elitnyja» kvadratnyja mietry.
Damy, katedžy, siadziby
Ceny na damy daŭno ŭžo iduć na miljardy biełaruskich rubloŭ i, adpaviedna, miljony dołaraŭ.
Najdaražejšaje žytło — «viła» u Raŭbičach, za jakuju prosiać 65 miljardaŭ rubloŭ (3,3 miljona dołaraŭ).
Trochuzroŭnievy dom z brusu staić na bierahavoj linii vadaschovišča. Na ŭčastku navat jość svoj pirs. Płošča doma — 496 kvadratnych mietraŭ.
U im jość šeść spalniaŭ, siem sanvuzłoŭ, basiejn z hiejzierami i hidrapuškaj.
Taksama jość haspadarčy błok: saŭna, chamam, spartzała, baskietbolnaja placoŭka, futbolnaje pole, haraž na dźvie mašyny, parkoŭka dla haściej. Usio heta, naturalna, abstalavana kamierami vonkavaha nazirańnia.
Učastak, na jakim staić dom, — 25 sotak.
Darečy, mahčymy varyjant z arendaj. Miesiac žyćcia ŭ takim domie abydziecca prykładna ŭ 18 tysiač dołaraŭ.
Za trochi mienšyja hrošy možna pasialicca ŭ Baraŭlanach. Tut pradajuć katedž płoščaj amal 700 mietraŭ. Učastak na jakim staić dom, — amal paŭhiektara.
«Sakavita i aptymistyčna!» — tak rekłamujuć žytło pradaŭcy. Za «sakavitaść» pryjdziecca addać 58 miljardaŭ rubloŭ (amal 3 miljony dołaraŭ).
Za hetyja hrošy prapanujuć dva damy. Asnoŭny «imkniecca da francuzskaha ampiru, ale pry hetym vyhladaje sučasna».
U domie jość kabiniet ź biljardnaj i biblijatekaj, chatni kinateatr, basiejn u mižziemnamorskim styli, saŭna, harderob, ciopły haraž. Mebla, kieramičnaja plitka, śviacilni — z kalekcyj viadučych italjanskich vytvorcaŭ.
Ścieny chaty — utoŭščki 70 sm.
Druhi dom maje płošču 233 mietry, pabudavany z brusu sibirskaj listoŭnicy i chvoi. Interjer — «ekałahičnaje dreva ŭ spałučeńni z kłasikaj, vykanany ŭ spakojnych tanach».
Nu i, plus, dahledžany ŭčastak, na jakim vysadžana bolš za 120 ihličnych i dekaratyŭnych raślin.
Kali na «viłu» ci «sakavitaść» trochi brakuje, možna razhledzieć tańniejšy varyjant — za 39,5 miljardaŭ rubloŭ (amal 2 miljony dołaraŭ). Hety katedž mieścicca ŭ vioscy Kamiennaja Horka — heta adrazu za MKADam, nasuprać adnajmiennaha mikrarajona.
Pradaŭcy abiacajuć niejmavierny kamfort.
5 sanvuzłoŭ, basiejn z hidrapuškaj i hiejzierami, kaskad-vadaspad, saŭna, spartzała… Usio, jak u najlepšych damach Paryža.
Na vulicy — placoŭki dla baskietboła i tenisa, manhał. Videakamiery ŭ kamplekcie. Płošča ŭčastka — 11 sotak. Dom — 362 kvadratnyja mietry.
Arenda tut troški tańniejšaja — 15—16 tysiač dalaraŭ na miesiac.
Taksama možna padabrać varyjant u Tarasavie. Prapanoŭ tut niekalki, usie kaštujuć kala 33—35 miljardaŭ (to bok 1,6—1,7 miljona dalaraŭ).
Voś, naprykład, trochuzroŭnievy dom na ŭčastku płoščaj 25 sotak.
Tut jość i asobny domik dla achoŭnikaŭ, i asobnaje pamiaškańnie z basiejnam i spartovaj załaj.
Akramia taho — statuja z vadaspadam u atačeńni biarozak.
Jašče adzin varyjant, jaki prapanuje rynak siońnia, — siadziba pad Minskam. Heta nie prosta dom, a ceły kompleks, jaki, pa słovach pradaŭcoŭ, znachodzicca ŭ «samym sercy bijałahičnaha zakaźnika «Juchnoŭski», u asiarodździ viekavoha lesu».
Za siadzibu chočuć 29 miljardaŭ 174 miljony rubloŭ (amal 1,5 miljona dołaraŭ). Za heta možna atrymać 50 sotak ziamli, dva damy, raspracavanyja finskaj firmaj: asnoŭny, płoščaj 300 kvadratnych mietraŭ, i haściavy, płoščaj 160 mietraŭ. U haściavym mieścicca taksama łaźnia i masažny kabiniet. Usie pabudovy novyja, pradajucca ŭpieršyniu.
Akramia hetaha, na ŭčastku jość altanka z ubudavanym kinateatram z vuličnaj aparaturaj, haściavaja stajanka na 4 aŭtamabili i viełaparkoŭka, dziciačaja i hulniavaja placoŭki i «ściežka zdaroŭja» na 500 mietraŭ udoŭžki.
Kvatery
24,6 miljarda rubloŭ (1,25 miljona dołaraŭ) kaštuje pientchaus u centry Minska na vulicy Šornaj.
Kvatera hatova da pražyvańnia: azdableńnie, mebla, santechnika – usio jość. Navat jość ułasnaja terasa płoščaj kala 40 mietraŭ.
Kuchnia-haścioŭnia — bolšaja za 60 mietraŭ. Taksama «u kamplekcie» 3 spalni, prybiralnia, vannaja, harderobnaja, łodžyja i kamorka.
Ahulnaja płošča žylla — 194 kv.m.
Za amal tyja ž hrošy pradajecca kvatera ŭ centry stalicy, 5 chvilin piechatoju ad parka Horkaha.
U 5-pakajovaj kvatery na Rumiancava ŭstanoŭlena prytokava-vyciažnaja vientylacyja, sistema «razumny dom» i «razumnaje śviatło», ciopłyja padłohi, sistema ačystki vady, kandycyjaniery, razvodka pad elektryku i santechniku.
Ścieny vyraŭnavany pad afarboŭku i navat dekaravany lapninaj. Płošča kvatery – 202 kvadratnych mietry.
Abydziecca heta ŭsio ŭ 24 miljarda rubloŭ (1,22 miljona dołaraŭ). Praŭda, miarkujučy pa fota, možna zrabić vysnovu, što skončvać ramont pryjdziecca novamu haspadaru.
Jašče adzin pientchaŭs možna nabyć za 23,6 miljona rubloŭ (kala 1,2 miljonaŭ dołaraŭ). Jon znachodzicca na vulicy Staražoŭskaj.
Płošča kvatery — 412 mietraŭ. Ź ich 214 zajmaje terasa na dachu.
Usia mebla — italjanskaja, na padłozie marmur, hranit, parkiet. Kvatera abstalavana sistemaj «razumny dom».
A na terasie praduhledžany kuchnia, duš, basiejn, kamin i načny kinateatr.
Za 17,7 miljardaŭ rubloŭ (900 tysiač dołaraŭ) pradajuć 6-pakajoŭku na Sobinava.
Ahulnaja płošča kvatery — amal 800 mietraŭ. Kvatera maje niekalki ŭzroŭniaŭ.
Cahlany dom, u jakim mieścicca žytło, byŭ pabudavany ŭ 2004 hodzie, tamu kvatera nie novaja, ale z ramontam.
Jość bałkon (łodžyja), Z asobnyja parkovačnyja miescy ŭ haražy.
Trochi tańniej kaštuje kvatera na vulicy Čechava. Za 16,8 miljarda rubloŭ — ci za 850 tysiač dołaraŭ — možna nabyć piacipakajoŭku ŭ domie 2002 hoda.
Jana pradajecca z meblaj i abstalavańniem, uklučajučy spartovaje. Płošča — 231 mietr.
Taksama jość parkovačnaje miesca ŭ padziemnym haražy.
Ci to haspadary, ci to pradaŭcy charaktaryzujuć kvateru tak: «Aŭtarski prajekt dyzajniera z suśvietnym imiem. CENTR. Dla tych, chto choča žyć u elitnym miescy, elitnym domie, z elitnymi susiedziami».
