Eks-kapitan BATE Lichtarovič čytaje vierš Maksima Bahdanoviča na śviacie movy ad velcom VIDEA
U minskim parku imia Janki Kupały prajšoŭ «adkryty ŭrok» pa biełaruskaj movie, jaki zładziła kampanija «velcom» pry padtrymcy Minadukacyi i Nacyjanalnaha centra sučasnych mastactvaŭ.
U miežach uroku školniki, nastaŭniki i viadomyja biełarusy čytali tvory ajčynnych kłasikaŭ, čyje jubilei śviatkujuć sioleta. Hučali vieršy Źmitraka Biaduli, Makisma Bahdanoviča i Janki Kupały, bajki Kandrata Krapivy.
U jakaści śpiecyjalnaha hościa prysutničaŭ i były kapitan futbolnaha kłuba BATE Dźmitry Lichtarovič. Jon pračytaŭ vierš Maksima Bahdanoviča «Voziera».
«Mianie zaprasili na hetaje mierapryjemstva i ja nie staŭ admaŭlać. Ja liču, što heta vielmi dobraja impreza, kab padtrymać rodnuju movu. Heta važna, — paviedamiŭ «Našaj Nivie» Dźmitryj Lichtarovič. — U niejki momant my zhubili, skažam tak, nacyjanalizacyju krainy. Bolšaść ludziej, usio ž, razmaŭlaje pa-rusku. A da biełaruskaj staviacca tak sabie. I z časam hetuju situacyju treba vypraŭlać».
Lichtarovičy pryjšli amal usioj siamjoj
Praŭda, były futbalist pryznaŭsia, što nie sam vybiraŭ vierš. Ale toj jamu spadabaŭsia.
«Ja sam, na žal, na biełaruskaj amal nie čytaju. Praca, siamja… i na ruskaj nie zaŭsiody atrymlivajecca pračytać štości», - skazaŭ Lichtarovič.
Prajekt «adkrytych urokaŭ» nakiravany na zacikaŭlenie dziaciej biełaruskaj movaj.
«My chočam pryvić dzietkam intares da movy. My pryvodzim da dziaciej žyvych kłasikaŭ biełaruskaj litaratury, jany pravodziać cikavyja zaniatki. Naša «metavaja aŭdytoryja» — vučni 2-ch i 3-ch kłasaŭ. Jany ž jak bieły list. Ich treba zacikaŭlivać, - skazaŭ Viačasłaŭ Śmirnoŭ, kiraŭnik adździeła karparatyŭnych kamunikacyj kampanii «velcom». — Naš prajekt achopić kala 15 tys. dziaciej. I, spadziajusia, što hetyja maleńkija hramadzianie buduć matyvavanyja bolš vyvučać, bolš cikavicca biełaruskaj litaraturaj i movaj».
Viačasłaŭ Śmirnoŭ
Śmirnoŭ pryznaŭ, što ŭ biznesie siońnia jość svojeasablivy trend na biełaruskuju.
«Siońnia naša kampanija ŭsiu imidžavuju rekłamu robić pa-biełarusku. Uvohule, ja baču siońnia ŭ hetym trend, tendencyju. Usio bolš kampanij pierachodzić na biełaruskuju nie tolki tamu, što jany chočuć padtrymać nacyjanalnuju kulturu, a tamu, što heta efiektyŭna. Efiektyŭna z kamiercyjnaha punktu hledžańnia: heta modna, heta vyklikaje cikavaść. I heta adbivajecca na zdabytkach taksama», - adznačyŭ Viačasłaŭ Śmirnoŭ.