«My hetaha nie kazali!» — francuzy złavili «Rasiju-24» na absalutnaj chłuśni
Francuzskija žurnalisty pierakłali na rodnuju movu siužet «ab jeŭraskieptykach» z prahramy Dźmitryja Kisialova.
Papularnaja pieradača Le Petit Journal francuzskaha telekanała Canal+, jakaja pierakazvaje ŭ styli satyryčnaha infatejtmientu naviny dnia, raspaviała, jak pieradajuć naviny z Francyi rasijskija telekanały i, u pryvatnaści, kanał «Rośsija 24». Žurnalisty praanalizavali strukturu vypusku prahramy «Viesti niedieli» Dźmitryja Kisialova ad 15 maja, a zatym sustrelisia ź ludźmi, jakich intervjuirujuć rabotniki rasijskaha TB.
Na sajcie «Rośsii-24» siužet prahramy «Viesti niedieli» pra situacyju ŭ Francyi pačynajecca na 52-j chvilinie i zajmaje kala 10 chvilin.
Hałoŭnaja tema zajaŭlena jak «rost ruchu jeŭraskieptykaŭ u Francyi». Tym nie mienš kamanda ŭ asnoŭnym zdymała manifiestacyi niezadavolenych novym zakonam ab pracy i intervjuiravała manifiestantaŭ, jakija adkazvali mienavita ŭ hetym kantekście, ničoha nie kažučy ni pra Jeŭropu, ni pra «jeŭraskieptycyzm».
Kali žurnalisty Le Petit Journal pakazali hierojam siužetu pierakład ich ułasnych słoŭ, tyja praktyčna nie pabačyli skazanaha imi.
«Heta žachliva, ahidna i abraźliva, što maje słovy pierakłali takim čynam. Heta navat nie pamyłkovy pierakład — hetyja słovy całkam vydumanyja», — kaža adna z apytanych, jakaja paśla taho, jak jaje słovy padvierhli «pierakładu», stała «śćviardžać», što baicca mihrantaŭ. «Nie, ja zusim nie bajusia mihrantaŭ. Ja skazała im, što adčuvaju siabie ŭ biaśpiecy, i što pytańnie mihrantaŭ dla mianie nijak nie źviazana z pačućciom niebiaśpieki, i što ja za toje, kab my prymali ludziej, jakija biahuć z krainy, dzie idzie vajna», — kamientuje jana pieradaču Dźmitryja Kisialova.
«Vy niesumlenny čałaviek, mianie vystavili rasistkaj», — źviartajecca staraja žančyna da rasijskaha žurnalista, prahledzieŭšy svajo intervju.
Intervju hetaj piensijanierki, byłoj supracoŭnicy meryi Nuazi-Lo-Sek, z dvanaccaci chvilin siužetu zajmaje amal šeść. Aryhinalny tekst dobra čuvać pad pierakładam, pažyłaja žančyna sprabuje rastłumačyć žurnalistu palityka-ekanamičnuju situacyju, jakaja skłałasia ŭ niebahatym pryharadzie Paryža.
Anton Ladaŭ, jaki pracuje dla prahramy «Viesti» na prybliznaj francuzskaj movie nakiroŭvaje razmovu ŭ patrebnaje jamu rečyšča: «Kolki ŭ vas tut miačeciaŭ?», «Vy ž pavinny płacić za hetych ludziej vašymi padatkami?», i nastojvaje, kab jaho surazmoŭnica acaniła kolkaść mihrantaŭ, jakija pražyvajuć u horadzie.
U adkaz u siužecie prahramy pažyłaja žančyna «kaža»: «Mianie nakiravali na piensiju, i ŭ hety ž čas naniali traich mihrantaŭ, z Ałžyra, Turcyi…». Paśla ŭbačanaha rasijskaha siužetu, piensijanierka była ździŭlenaja. «Heta chłuśnia i vielmi niapravilnaja interpretacyja maich słovaŭ», — patłumačyła jana žurnalistu Le Petit Journal. U siužecie, jaki možna znajści na sajcie «Rośsii-24», hetych słoŭ užo niama.
U toj častcy, dzie žurnalist pytajecca pra mihrantaŭ, jana zhadvaje i vychadcaŭ z Mahryba, i ŭradžencaŭ Partuhalii i Ispanii. Le Petit Journal śćviardžaje, što paśla ich publikacyi «Rośsija-24» spačatku zusim źniała siužet z sajta, a zatym pastaviła znoŭ, ale ŭžo z vypraŭleńniami.
Jašče ŭ adnym epizodzie idzie havorka pra budynak liceja ŭ 19-j akruzie Paryža, jaki, pa słovach žurnalista, zaniali «mihranty», tak što ŭładam daviałosia vysielić adtul škołu. Mer 19-j akruhi, da jakoha źviarnuŭsia Le Petit Journal, paviedamiŭ, što budynak «pustavaŭ z 2011 hoda, heta značyć zadoŭha da mihracyjnaha kryzisu».
Akramia «zvyčajnych francuzaŭ», dla siužetu byli prainterviuiravany dva palityki. Prahledzieŭšy «pierakład» svaich słoŭ, były ministr Bruno Lo Mer vykazaŭ pažadańnie, kab rasiejskija telekanały nie vyrazali jaho słoŭ i pieradavali ich dakładna. Pakazanaje «nie padobna da taho, što ja skazaŭ», — zajaviŭ jon žurnalistam Le Petit Journal. U pierakładzie asablivy akcent robicca na frazie «My pavinny bolš supracoŭničać z Rasiejaj». Pierad źjaŭleńniem jašče adnaho palityka — Žana-Mary Le Piena — viadučy kaža: «Užo ciapier u hetaj vysnovie niama nijakich sumnievaŭ».
I zaklučaje: «Pasył jasny. Z-za Jeŭropy ŭ Francyi ludzi łamajuć usio zapar na vulicach, demakratyi bolš niama, mihranty ŭsich trymajuć u strachu, zajmajuć francuzskija pracoŭnyja miescy i francuzskija škoły. Zastajecca adno vyjście — heta Rasieja».
