MUS nie bačyć nieabchodnaści va ŭzmacnieńni kantrolu na biełaruska-rasiejskaj miažy
Hałoŭnaje ŭpraŭleńnie narkakantrolu i procidziejańniu handlu ludźmi kryminalnaj milicyi Ministerstva ŭnutranych spraŭ nia bačyć nieabchodnaści va ŭzmacnieńni kantrolu na biełaruska-rasiejskaj miažy.
Heta vynikaje z adkazu na zvarot namieśnika staršyni partyi BNF Ryhora Kastusiova. Palityk nastojvaŭ, što taki kantrol musić być uzmocnieny, bo narkotyki i zbroja amal bieź pieraškodaŭ traplajuć u Biełaruś praz «adkrytaść miažy z Rasiejskaj Federacyjaj».
«Supradziejańnie niezakonnamu abarotu narkotykaŭ va ŭschodnim kirunku ažyćciaŭlajecca na pastajannaj asnovie ŭsimi pravaachoŭnymi arhanami, u tym liku, u ramach udziełu ŭ dziejnaści ADKB», — śćviardžajecca ŭ adkazie za podpisam kiraŭnika viedamstva Vasila Łosiča.
Pavodle milicyjanta, «Biełaruś źjaŭlajecca aktyŭnym udzielnikam mižnarodnaj antynarkatyčnaj aperacyi «Kanał» pa pierakryćci kanałaŭ kantrabandy narkotykaŭ».
U adkazie zhadvajecca i dekret Alaksandra Łukašenki «Ab nieadkładnych mierach pa procidziejańni niezakonnamu abarotu narkotykaŭ», pavodle jakoha była ŭviedzienaja kryminalnaja adkaznaść za niezakonnaje pieramiaščeńnie praź dziaržaŭnuju miažu Biełarusi narkotykaŭ u ramkach Eŭrazijskaha ekanamičnaha sajuzu.
Pavodle aficyjnaj statystyki ŭ Biełarusi na ŭliku bolš za 6 tysiač narkamanaŭ, miž tym niezaležnyja eksperty miarkujuć, što nasamreč tryvała zaležać ad užyvańnia narkotykaŭ nia mienš za 50 tysiač biełarusaŭ.
Jakija narkotyki i adkul traplajuć u Biełaruś?
Jak zaznačajuć eksperty, z Rasiei ŭ Biełaruś pranikajuć u asnoŭnym hašyš i hierain, z Ukrainy opijumnyja narkotyki i marychuana. Niamała tradycyjnych narkotykaŭ zavoziać taksama z dalniaha zamiežža tranzytam u krainy Eŭraźviazu.
Što da syntetyčnych narkotykaŭ, jakija stali asabliva papularnymi ŭ apošnija hady, jany patraplajuć zvyčajna albo praz krainy Eŭropy, albo z Kitaja praz Rasieju.
Druhi miesiac u Mienskim haradzkim sudzie prachodzić praces nad 17 hramadzianami, jakich abvinavačvajuć u raspaŭsiudzie psychatropaŭ, dastaŭlenych z Rasiei. Na łavie padsudnych u tym liku były supracoŭnik KDB, były milicyjant i były žurnalist.