Skulptury Danateła z bunkiera ŭ Bierlinie znajšlisia ŭ Maskvie
Dziasiatki tvoraŭ skulptaraŭ italjanskaha Adradžeńnia z Muzieja Bode ŭ Bierlinie, jakija ličylisia zhublenymi padčas Druhoj suśvietnaj vajny, znojdzienyja ŭ DMII imia Puškina ŭ Maskvie.
Muziej Bode. Fota Getty
Fond Pruskaj kulturnaj spadčyny paćvierdziŭ u sieradu hetuju infarmacyju.
Havorka idzie pra pracy Danateła, Nikoła i Džavani Piza, Cina dy Kamaina, Andrea del Vierokjo, Łuka deła Robi i inšych majstroŭ.
Raniej ličyłasia, što pracy italjanskich raźbiaroŭ, jakija padčas vajny byli schavanyja ŭ bunkiery ŭ bierlinskim rajonie Frydrychschajn, nie zachavalisia.
Maskoŭski muziej vyjaŭlenčych mastactvaŭ paviedamiŭ u čaćvier, što sumiesny dakład ab znachodžańni 59 skulptur byŭ pradstaŭleny 3 maja ŭ niamieckim Instytucie historyi mastactvaŭ u Fłarencyi.
Adkryćcio ździejśniena ŭ chodzie raboty DMII imia Puškina i Muzieja Bode nad prajektam «Danateła i Źnikły muziej», pačatym u 2015 hodzie.
Skulptury surjozna paciarpieli ad pažaru ŭ 1945 hodzie i majuć patrebu ŭ restaŭracyi, pierš čym ich udasca viarnuć u navukovy abarot i ekspazicyjny stan, havorycca ŭ pres-relizie maskoŭskaha muzieja.
Terminy zaviaršeńnia restaŭracyjnych rabot nie ahučvajucca.
Niamieckija ŚMI nazyvajuć znachodku siensacyjnaj. Jany adznačajuć, što ciapier u Rasii i inšych krainach byłoha SSSR znachodzicca bolš za adzin miljon tvoraŭ mastactva, vyviezienych z Hiermanii paśla jaje parazy ŭ Druhoj suśvietnaj vajnie.