Suicydalnyja supołki Ukantakcie stali prablemaj u Rasii: udzielnikaŭ zambujuć na samahubstva?
U rasijskaj «Novaj hazietie» źjaviłasia vialikaje raśledavańnie Haliny Mursalijevaj pra suicydy siarod dziaciej i padletkaŭ. Vydańnie kaža, što heta abaviazkova musiać pračytać baćki, kab «paśpieć vyratavać svaich dziaciej ad fatalnaha kroku».
Vydańnie praanalizavała vypadki samahubstvaŭ siarod dziaciej i padletkaŭ za apošnija paŭhoda ŭ Rasii. Žurnalistka prychodzić da vysnovy, što vielmi časta za takimi trahičnymi vypadkami stajać sumnieŭnyja supołki ŭ sacyjalnaj sietcy Ukantakcie, dzie dzieci baviać šmat času.
Papularnaść jany nabyli paśla taho, jak letaś vosieńniu skončyła žyćcio samahubstvam usuryjskaja školnica Ryna. Pierad śmierciu jana pakinuła na svajoj staroncy zapis: «Nia. Poka». «Nia» — heta taki japonski anałah našaha «miaŭ».
Faktyčna, Ryna pieratvaryłasia ŭ sapraŭdny internet-miem. Mnohija karystalniki Ukantakcie pišuć, što zachaplajucca joj i chočuć dałučycca da jaje. Śmierć Ryny kamiercyjalizavali, pradajuć skryny jaje pierapisak ci elemienty adzienńnia, zdymajuć mahiłu. I achvotnyja nabyć takija atrybuty znachodziacca.
Simvałam samahubcaŭ staŭ kit, bo hetyja žyvioły vykidvajucca na sušu. I adminy supołak pišuć kštałtu: «Viedaješ ad čaho kity vykidvajucca na bierah? Ad adčaju». Vydańnie papiaredžvaje: kali vašy dzieci malujuć kitoŭ, heta moža być nie tak miła, jak padajecca na pieršy pohlad.
U jakaści atrybutu vykarystoŭvajecca taksama kniha Stejs Kramier «50 dzion da majho samahubstva». Heta raman z apisańniami pieražyvańniaŭ dziaŭčyny-padletka, jakaja vyrašyła, što za 50 dzion vyrašyć, ci joj žyć, ci pamierci. U rukach manipulataraŭ nazva hetaj knihi stała mahutnaj zbrojaj. I niekatoryja ŭdzielniki takich hrup pryznačajuć svaje «50 dzion».
Jak dziejničajuć takija supołki? Spačatku karystalnik ustupaje ŭ adkrytuju supołku kštałtu «Morie kitov», dzie jamu ŭparvajuć dumki ab biessensoŭnaści žyćcia, ab jaho niedaskanałaści i pra toje, što vakoł usio kiepska. Praź niejki čas adbyvajecca pierachod u inšuju, užo zakrytuju, supołku. Potym idzie pierachod jašče na adzin uzrovień. Usie heta ŭ niejkaj stupieni nahadvaje hulniu, ale hulniu dastatkova złaviesnuju.
Udzielnikam prapanujecca razhadvać «sensy» i «iścinu», praz šerah niejkich zadačak i šarad, jakija mohuć być častkova napisanyja na habrejskaj ci łacinie, razbaŭlenyja cytatami pra śmierć ź Biblii, Karana ci Tory, tajamničyja ličby. Naturalna, što nijakich hłybinnych sensaŭ u takich pasłańniach niama, a idzie zatumańvańnie mazhoŭ.
«Novaja hazieta» piša, što na apošnim etapie i adbyvajecca zambavańnie ŭdzielnikaŭ na samahubstvy. Pryčym zdarycca jano pavinna ŭ kankretny čas i dzień. Faktyčna niekatoryja suicydy mohuć anansavać anłajn u takich zakrytych supołkach. Pryčym, jak tłumačać achviary, vybirajuć samych «hodnych». Samahubstvy padajucca ŭ ramantyzavanym i hieraičnym śviatle. Zdymajucca pastanovačnyja videa, kab padmacavać takija pierakanańni.
Adbyvajucca takija pierapiski vielmi časta a 4:20 nočy. Dzieci źviečara kładucca spać, adnak ustajuć u hety čas, kab razmaŭlać sa svaimi «kuratarami». U 6:00 jany znoŭ kładucca ŭ łožak, kab baćki ni pra što nie zdahadalisia.
Rasijskija ŭłady vydalajuć padobnyja supołki z Ukantakcie, ale na ich miescy paŭstajuć novyja. Tamu zmahacca z hetaj źjavaj dastatkova składana.
Varta adznačyć, što častka internet-karystalnikaŭ nie pastaviłasia ŭsurjoz da infarmacyi «Novaj haziety». Naprykład, snob.ru paviedamlaje, što infarmacyi ab samahubstvach na padobnych staronkach u sacsietkach byli fejkavymi i pastanovačnymi. Maŭlaŭ, administratary hrup šukali staronki padletkaŭ, jakija ŭžo ździejśnili samahubstvy, a paśla vydavali hetych ludziej za ŭdzielnikaŭ svaich supołak.
Aŭtaram «Mora kitoŭ» nazyvajuć Filipa Čełava (jon ža Filip Lis i Filip Ćviatanski).
