U Kitai zapuścili servis dla skarhaŭ na čutki i plotki
Ułady Kitaja zapuścili internet-płatformu, z dapamohaj jakoj hramadzianie krainy zmohuć paviedamlać ab roznych čutkach i plotkach ŭ siecivie.
Novy servis dazvolić kitajcam paviedamić uładam pra iłžyvuju, na ich dumku, infarmacyi, jakaja źjaviłasia ŭ internecie. Heta možna zrabić, zahruziŭšy spasyłku na materyjał abo prymacavaŭšy skrynšot.
Paskardzicca možna budzie na infarmacyju ŭ luboj sacyjalnaj sietcy abo na lubym forumie.
Pavodle dadzienych kitajskaj dziaržaŭnaj haziety Global Times, jakaja anansavała zapusk servisu, u jaho raspracoŭcy ŭdzielničali ministerstva hramadskaj biaśpieki i kitajski anałah tvitera Sina Weibo.
Štomiesiac servis budzie publikavać spravazdaču pra čutki i plotki ŭ siecivie, a taksama źviazanuju ź imi infarmacyju, paviedamlaje hazieta sa spasyłkaj na zajavu Sina Weibo.
Kampanija abiacała błakavać karystalnikaŭ, jakich vykryli ŭ raspaŭsiudzie čutak. U Sina taksama abiacali, što ich spravami zojmiecca palicyja.
U krasaviku kiraŭnik Kitaja Si Czińpin zajaviŭ, što Kitaju treba palepšyć jakaść kiravańnia internetam, a ŭładam — zabiaśpiečyć karystalnikaŭ jakasnym kantentam.
Ułady krainy praciahvajuć rabić bolš žorstkim kantrol nad internetam. Pravaachoŭnyja orhany ŭžo daŭno sprabujuć znachodzić i karać ludziej, jakija raspaŭsiudžvajuć čutki. Ułady miarkujuć, što łžyvaja infarmacyja moža pryvieści da paniki.
Za raspaŭsiud čutak ab vybuchu ŭ Ciańczini, jaki adbyŭsia ŭ žniŭni minułaha hoda, užo byli pakaranyja prykładna 197 čałaviek, pieradaje hazieta. U pryvatnaści, palicyja zatrymała 24-hadovaha karystalnika internetu, jaki zajaviŭ, što padčas vybuchaŭ zahinuła tysiača čałaviek.