Sony zapatentavała kamieru ŭ kantaktnaj linzie, jakaja kirujecca mirhańniem
Karparacyja Sony zapatentavała kantaktnuju linzu, jakaja zdolnaja zapisvać, zachoŭvać i pieradavać vyjavy. Pra heta ŭ sieradu, 4 maja, piša N+1 sa spasyłkaj na partał IFL Science.
Vajava: Sony Corporation / U.S. Patent and Trademark Office
U kancepcyi kantaktnaj linzy apisana, što jana abstalavanaja kiraŭničym modulem, biespravadnoj suviaźziu, aksieleromietram, hiraskopam, infračyrvonym datčykam, pjezadatčykam, ubudavanaj pamiaćciu, a taksama modulem ź linzaj dla zapisu vyjavy. A taksama z dapamohaj anteny možna budzie naładzić pryjom-pieradaču infarmacyi i biespravadnuju pieradaču siłkavańnia na linzu.
Miarkujecca, što modul kiravańnia kamieraj budzie adkazvać za fakusoŭku i nabližeńnie vyjavy, a zapis i prajhravańnie buduć kiravacca mirhańniem. Pryčym pryłada budzie adździalać mižvolnyja ruchi paviekam ad śviadomych kamand, jakija padajucca karystalnikam.
Zapisanyja dadzienyja zmohuć zachoŭvacca na ŭbudavanaj pamiaci pryłady dla dalejšaha prajhravańnia. Heta značyć, karystalnik faktyčna zmoža nanova pieražyć zapisany momant, prosta zapluščyŭšy vočy. Taksama zapisanyja dadzienyja možna budzie pieradać na mabilnuju pryładu abo stacyjanarny kampjutar.
Patent Sony nie harantuje taho, što rabočy pratatyp budzie stvorany ŭ budučyni. Adnak raspracoŭki ŭ hetaj halinie ŭžo daŭno viaducca i inšymi kampanijami.
