Vakansii krasavika: chto patrabujecca i na jakija zarobki
Dzie ŭ nas sapraŭdy stabilnaść, dyk heta na rynku pracy.
Stalica: ajcišniki i dyrektary
U Minsku ŭsio jak zvyčajna: staličnym kampanijam ludzi patrebnyja. Ale, kali vy chočacie zarabić dobryja hrošy, to tut faktyčna dva šlachi: ci to ŭ ajcišniki, ci to ŭ dyrektary. Na vaš hust.
Vakansij ajcišnikaŭ sapraŭdy šmat. Zvyčajna patrabujucca raspracoŭniki mabilnych dadatkaŭ, zarobak prapanujuć 2—3,5 tysiačy dołaraŭ. Ale, u zaležnaści ad vašych viedaŭ ci kankretnych patrabavańniaŭ, možna znajści vakansii dzie abiacajuć i da 5 tysiač.
Taksama, IT-kampanii šukajuć mieniedžaraŭ prajektaŭ i mieniedžaraŭ dla prasoŭvańnia svaich praduktaŭ. Zarobak tradycyjna niebłahi: da 3500 dołaraŭ.
Taksama patrebnyja kiraŭniki, jaki buduć vieści biełaruska-kitajski biznes. Naprykład, kali vy viedajecie kitajskuju movu ŭ daskanałaści, viedajecie asablivaści kitajskich rynkaŭ tavaraŭ i pasłuh i zhodnyja na nienarmavany pracoŭny dzień, to možacie raźličvać na 70 miljonaŭ rubloŭ.
Kiroŭca-mižnarodnik moža pryvozić damoŭ 2 tysiačy dołaraŭ štomiesiac. Kali maje pravy katehoryi S i Je.
Hałoŭny inžynier prajekta ŭ budaŭničaj kampanii — pry ŭmovie vopytu ad 6 hadoŭ — zmoža zarablać ad 30 miljonaŭ.
Taksama, kali chtości nie suprać stać mieniedžaram pa prodažach białkovaj syraviny, to takomu supracoŭniku abiacajuć płacić ad 20 miljonaŭ rubloŭ. I navat apłociać mabilnuju suviaź.
Narmalny zarobak prapanujuć i doktaru-hienietyku. Praŭda, tamu patrebna być «lidaram dumak» (što b heta ni značyła). Takomu hienietyku možna raźličvać na pracu ŭ biełaruskaj filijai rasijskaj kampanii. Płacić buduć ad 15 da 25 miljonaŭ.
Praŭda, patrebnyja i tyja, chto ŭmieje dobra pracavać rukami. Moža vy majecie vysokija navyki paŭaŭtamatyčnaj / ručnoj abo arhonavaj zvarki, čytajecie i razumiecie čarciažy? A to tut abiacajuć ad 16 da 28 miljonaŭ zvyčajnamu zvarščyku (kali abjava nie chłusić, kaniečnie).
Ale asnoŭnaja masa abjavaŭ prapanujuć zarobki zusim nie takija. Za apošnija 30 dzion u stalicy źjaviłasia 522 vakansii, dzie možna zarabić bolš za 20 miljonaŭ. Ad 15 miljonaŭ abiacajuć u 1023 vakansijach, ad 10 — u 2200. Ale bolšaść — heta abjavy, dzie paznačany zarobak ad 4 da 10 miljonaŭ. Heta jak zvyčajna, nastaŭniki, budaŭniki, daktary. Sacyjalnyja rabotniki, jak zvyčajna, znachodziacca ŭ samym nizie — im abiacajuć 2—2,5 miljona rubloŭ. Praściej užo pajści ŭ prybiralščycy — tut možna zarabić 3—3,5 miljony. A kali sumiaščać pasadu prybiralščycy i myć posud, jak heta prapanujuć u adnym ź minskich sušy-baraŭ, to možna zarabić ažno 6 miljonaŭ. Dla paraŭnańnia, dyrektaru dziciačaha sadka ŭ Homielskaj vobłaści, abiacajuć u dva razy mienšy zarobak — 2,8 miljona.
U abłaściach: iznoŭ ajcišniki
U abłasnych centrach lidary pa zarobku — taksama prahramisty i nšyja supracoŭniki IT-śfiery. Ale tut jość i svaje asablivaści. Tak, u Breście ŭsiaho tolki 16 vakansij, u jakich paznačany zarobak bolšy za 20 miljonaŭ. Akramia ajcišnikaŭ u im — kiroŭcy-mižnarodniki. U Viciebsku takich abjavaŭ 14: ajcišniki, kiroŭcy-mižnarodniki i adździełačniki. U Homieli — ajcišniki, namieśniki dyrektara i — praŭda tut sa svajoj mašynaj — kiroŭca taksi (usiaho 24 abjavy). Prykładna toje ž sama i ŭ Hrodna i Mahilovie. Paŭsiul narmalnyja hrošy mohuć zarabić pieravažna ajcišniki. I, časam, chto-niebudź inšy.
Darečy, časam «biudžetniki» mohuć padzarabić na pryvatnych kursach. Tak, naprykład, u Homieli šmat vakansij dla vykładčykaŭ: historyja, fizika, psichałohija. Praŭda, zarobak dla takich śpiecyjalistaŭ nie ŭkazany, pišuć: «pa damoŭlenaści».
Akcior? Atrymaj 120 dołaraŭ
Akciory, artysty (dramy, chora, baleta) — mohuć raźličvać u asnoŭnym na 2,5 miljona. Tut u paraŭnańni ź minułym miesiacam taksama ničoha nie źmianiłasia. Tym, chto ŭmieje śpiavać, — praściej. Tak, naprykład, bek-vakalistka ŭ načnym karakoje ŭ Minsku moža atrymlivać kala 7—8 miljonaŭ u miesiac. Pracavać pryjdziecca 2 dni praz 2. Plus nakormiać.
Palihłot na 8 miljonaŭ
U maleńkich haradach zarobki ŭvohule niezrazumiełyja. Tak, naprykład, veb-raspracoŭščyku ŭ Oršy prapanujuć ad troch miljonaŭ rubloŭ. Dyrektaru vinarobnaha zavodu ŭ Połacku — 10 miljonaŭ. A namieśnik dyrektara na adnym z pradpryjemstvaŭ taho ž Połacka moža atrymać 8 miljonaŭ. Pry hetym, viedańnie anhlijskaj, azierbajdžanskaj, tureckaj — abaviazkovaje. A inžynier u Słucku moža raźličvać na 4 miljony (adznačym, što prykładna stolki abiacajuć i traktarystam).