Hulnia z zapałkami ledź nie kaštavała žyćcia piacihadovym chłopčykam i ich baćku
Na pažary ŭ šmatpaviarchovym domie ŭ Ivanavie Bresckaj vobłaści vyratavanyja dvoje dziaciej i ich baćka, paviedamili ŭ Bresckim abłasnym upraŭleńni MNS.
Paviedamleńnie pra pažar pastupiła 11 lutaha kala 13 hadzin. Dyśpietčaru słužby 101 minak raspavioŭ, što z akna kvatery na piatym paviersie idzie dym. Supracoŭniki MNS vyratavali z padpalenaj kvatery dvuch piacihadovych chłopčykaŭ i ich baćku 1986 hoda naradžeńnia. Ich abśledavali rabotniki chutkaj dapamohi. Dzieci ŭ miedycynskaj dapamozie nie mieli patreby. Haspadar kvatery z papiarednim dyjahnazam «atručeńnie praduktami hareńnia, termičny apiok vierchnich dychalnych šlachoŭ siaredniaj ciažkaści» špitalizavany ŭ reanimacyjnaje adździaleńnie Ivanaŭskaj rajonnaj centralnaj balnicy.
U momant pažaru mama chłopčykaŭ znachodziłasia na pracy. Dziaciej advieźli da babuli, jakaja taksama žyvie ŭ Ivanavie.
Pažar likvidavany za 10 chvilin. Ahniom paškodžanyja mebla i ŭnutranaje azdableńnie kuchni, zakuranyja ścieny i stol u kvatery. U MNS miarkujuć, što pryčynaj uzharańnia stała dziciačaje svavolstva z zapałkami.
