«Stolki času śviet čakaŭ hetaha» — mitrapalit Tadevuš Kandrusievič z nahody sustrečy Papy i Patryjarcha Maskoŭskaha
Zvarot Mitrapalita Tadevuša Kandrusieviča, Staršyni Kanfierencyi Katalickich Biskupaŭ u Biełarusi, da viernikaŭ i ŭsich ludziej dobraj voli ŭ suviazi z sustrečaj 12 lutaha na Kubie Papy Franciška i Patryjarcha Maskoŭskaha i ŭsiaje Rusi Kiryła
«Kab usie byli adno! Boža, błahasłavi sustreču Papy Franciška i Patryjarcha Kiryła! Narešcie! Tak i chočacca ŭskliknuć: «Dziakuj Bohu, jaki biaźmiežny ŭ svajoj miłasernaści!», — havorycca ŭ zvarocie mitrapalita Tadevuša Kandrusieviča.
«Stolki času śviet čakaŭ sustrečy Rymskaha Papy i Maskoŭskaha Patryjarcha. I voś Boh adorvaje nas daram łaski ich sustrečy, jakaja adbudziecca 12 lutaha hh. u budynku Mižnarodnaha aeraporta ŭ Havanie.
Miescam sustrečy Boh abraŭ Kubu, krainu, dzie jašče nie tak daŭno relihija žorstka pieraśledavałasia, ale adnačasova i krainu, jakuju ŭžo naviedali śviaty Jan Pavieł II, Benedykt XVI i Francišak. Naviedaŭ jaje i Patryjarch Maskoŭski ŭ svaju bytnaść jašče Staršynioj Adździeła źniešnich carkoŭnych suviaziaŭ Maskoŭskaha Patryjarchatu.
Sustreča adbudziecca ŭ Novym Śviecie, jaki nie datyčny da balučych padziełaŭ chryścijanstva, što dahetul źjaŭlajucca niezalečanaj i kryvaciečnaj ranaj na adzinym Mistyčnym Ciele Chrysta.
Mienavita tamu Havana — adpaviednaja niejtralnaja placoŭka dla takoj važnaj i vielmi patrebnaj sustrečy».
«Sučasny śviet raźvivajecca imkliva. Kožny dzień prynosić usio novyja i novyja vykliki, u tym liku i maralnaha charaktaru. Na ich nieabchodna jak maha chutčej adkazvać, bo zaŭtra moža być zanadta pozna. Treba adkazvać supolna, kab adkaz byŭ macniejšym i paćviardžaŭ adzinstva. Padčas sustrečy suśvietnych chryścijanskich lidaraŭ buduć abmierkavany pytańni hanieńniaŭ chryścijan, dvuchbakovych adnosin i mižnarodnaj palityki. Pa vynikach sustrečy budzie padpisana supolnaja dekłaracyja. Sam fakt sustrečy nieabchodna acanić jak viechu ŭ adnosinach Katalickaha Kaścioła i Maskoŭskaha Patryjarchatu», — adznačajecca ŭ zvarocie mitrapalita Katalickaj carkvy ŭ Biełarusi.
«Upeŭnieny, što doŭhačakanaja sustreča stanie novym krokam da ažyćciaŭleńnia zakliku Chrysta da adzinstva chryścijan i nadaść jamu novy dynamizm. Jana taksama budzie spryjać sumiesnamu abviaščeńniu Jevanhiella, abaronie chryścijanskich kaštoŭnaściaŭ i budavańniu cyvilizacyi žyćcia, lubovi i miru. Jana adkryje novuju staronku ŭ adnosinach pamiž Katalickim Kaściołam i Pravasłaŭnaj Carkvoj i pakaža śvietu, što mara śviatoha Jana Paŭła II ab tym, kab chryścijanstva dychała dvuma lohkimi — Zachodnim i Uschodnim — ažyćciaŭlajecca».
«Simvalična, što sustreča dvuch lidaraŭ suśvietnaha chryścijanstva adbudziecca ŭ Jubilejny Hod Božaj Miłasernaści i adrazu paśla śviata Najśviaciejšaj Panny Maryi ź Lurda, jakoje Kaścioł adznačaje 11 lutaha jak Suśvietny dzień chvorych. Sučasny śviet chvory, najpierš duchoŭnym niedamahańniem, i jaho nieabchodna lačyć sumiesnymi vysiłkami chryścijan roznych vieravyznańniaŭ, asabliva katolikaŭ i pravasłaŭnych, pohlady jakich na maralnyja prablemy sučasnaści vielmi blizkija.
Pradstaŭnictvam Maci Božaj Lurdskaj zaklikaju ŭsich viernikaŭ malicca ŭ intencyi sustrečy Papy Franciška i Patryjarcha Kiryła, kab Boh jaje błahasłaviŭ i kab jana sapraŭdy pryniesła dobryja plony», — adznačaje mitrapalit Tadevuš Kandrusievič.
