SK: Pryčynaj śmierci školnaj nastaŭnicy ŭ Breście stała ŭtapleńnie
Pavodle zaklučeńnia sudmiedekśpiertyzy, pryčynaj śmierci školnaj nastaŭnicy, trup jakoj znajšli ŭ Breście kala bieraha raki, stała ŭtapleńnie, paviedamiŭ žurnalistam u Breście 5 lutaha staršynia Śledčaha kamiteta Biełarusi Ivan Naskievič.
«Ci źjaŭlajecca jano śledstvam samahubstva albo heta niaščasny vypadak — pakul kazać rana. Napieradzie jašče vialiki abjom śledčych mierapryjemstvaŭ», — skazaŭ Naskievič.
Pavodle jaho słoŭ, śladoŭ hvałtoŭnaj śmierci nastaŭnicy nie vyjaŭlena. Pakul niama adkazu na pytańnie, jak jana i ź jakoj metaj apynułasia ŭ hetym biaźludnym miescy, dzie jaje znajšli miortvaj.
«Ja spadziajusia, što na praciahu terminu rasśledavańnia my dakapajemsia da iściny i rasstavim usie kropki nad i», — dapoŭniŭ Naskievič.
Nahadajem, cieła 38-hadovaj Valanciny Hołub, nastaŭnicy siaredniaj škoły № 9 Bresta, było znojdziena ŭ Breście 29 studzienia kala bieraha raki Muchaviec u zamiorzłaj vadzie na nizinnym učastku miascovaści, pakrytym hustoj raślinnaściu.
Žančyna 22 śniežnia kala 14.00 pajšła sa škoły paśla pracy i doma nie źjaviłasia. Jaje mabilny telefon zastaŭsia na pracy. Na suviaź z rodnymi i blizkimi žančyna nie vychodziła. 23 śniežnia ŭ 21.00 u milicyju źviarnuŭsia muž źnikłaj.
Druhoha studzienia Bresckim mižrajonnym adździełam Śledčaha kamiteta była raspačata kryminalnaja sprava pa fakcie źniknieńnia Valanciny Hołub. Vyśviatlajucca akaličnaści jaje śmierci.