Sud Jerusalima abaviazaŭ niaviestu zapłacić žanichu 60 tysiač šekielaŭ za admovu ad viasiella
Ijerusalimski miravy sud prysudziŭ da vypłaty 60 tysiač šekielaŭ (bolš za 15 tysiač dalaraŭ) kampiensacyi 19-hadovuju žycharku horada, jakaja pieradumała vychodzić zamuž za dva tydni da viasiella, paviedamlaje NEWSru Israel.
Viasielle artadaksalnych habrejaŭ, ilustracyjnaje fota. Getty Images
Sud pryznaŭ abiacańnie vyjści zamuž kantraktam, za nievykanańnie jakoha bok, što jaho parušyŭ, pavinien vypłacić paciarpiełamu kampiensacyju za materyjalnuju i niemateryjalnuju škodu.
Sud taksama ŭskłaŭ na dziaŭčynu apłatu sudovych vydatkaŭ u pamiery 15 tysiač šekielaŭ (kala 3,8 tysiačy dalaraŭ).
Partał NRG udakładniaje, što pazoŭnik i adkazčyca — pradstaŭniki ultraartadaksalnaj habrejskaj abščyny, jakija paznajomilisia praz svaćciu. Praź niekalki miesiacaŭ paśla znajomstva dziaŭčyna i chłopiec vyrašyli ažanicca.
Ale ŭžo paśla zmovin, za dva tydni da viasiella, niaviesta pieradumała. Pry hetym para paśpieła zamović zału ŭračystaściaŭ, razdrukavać zaprašeńni, prajści hienietyčnyja pravierki, zakupić meblu dla spalni i bytavyja elektraprybory. Bolšuju častku vydatkaŭ apłaciŭ žanich.
U sudzie dziaŭčyna pasprabavała apraŭdać svajo rašeńnie fizičnym hvałtam z boku žanicha, adnak nie pryviała nijakich dokazaŭ svaich zajaŭ, tady jak žanich pradstaviŭ sudu ich pierapisku ŭ sacyjalnaj sietcy i pakazańni śviedak. Sud padkreśliŭ, što nie moža prymusić niaviestu vykanać abiacańnie vyjści zamuž, adnak pryznaŭ, što jana pavodziła siabie lehkadumna, prymusiŭšy žanicha panieści surjoznyja finansavyja vydatki.
