Fielhienhaŭer: Turki za dźvie hadziny voźmuć rasiejskija systemy S-400 u Siryi ŭ jakaści trafieja
Tureckaja armija naležyć da liku samych padrychtavanych u śviecie. U XX stahodździ jana nie raz vajavała. Fota Minabarony Turcyi.
Rasija faktyčna ŭvajšła ŭ asablivy pieradvajenny pieryjad u suviazi sa źbitym tureckimi źniščalnikami rasijskim frantavym bambavikom Su-24. Pra heta ŭ błohu na «Echie Maskvy» napisaŭ rasijski vajskovy ekśpiert Pavieł Fielhienhaŭer.
Ekśpiert adznačyŭ, što turkamany (turkmieny), jakich bambili rasijskija samaloty, u Turcyi ŭsprymajucca jak turki, jakich tureckija Uzbrojenyja siły pavinny biezumoŭna abaraniać. U chodzie siryjskaj hramadzianskaj vajny turkmieny, pry padtrymcy Turcyi, ačyścili paŭnočnuju hornuju častku pravincyi Łatakija ad ułady Bašara Asada. Ciapier siły Asada pry padtrymcy rasijskaj avijacyi sprabujuć razhramić asnoŭnyja siły turkmienskaha apałčeńnia.
«Zhodna ź infarmavanymi krynicami ŭ Ankary, prezident Erdahan jašče ź leta nastojvaŭ, kab tureckaja armija pierajšła miažu i ustanaviła ŭ Paŭnočnaj Siryi niejkuju bufiernuju zonu, ale turecki hienštab admoviŭsia. Uletku apazicyja i turkmienskaje apałčeńnie paśpiachova nastupali i pašyrali ŭ bok Łatakii zonu kantrolu. Siońnia pad ŭdarami sił Asada i rasijskimi bombami front u Paŭnočnaj Łatakii ŭ cełym pakul trymajecca, ale traščyć, a šerah važnych pazicyj byŭ zhubleny. Kali front abryniecca, to ŭradavyja vojski vyjduć na pramuju darohu da stalicy pravincyi Idlib, a šmattysiačnaje miascovaje turkmienskaje nasielnictva pabiažyć ratavacca ŭ Turcyju», — zajaviŭ jon.
Ekśpiert padkreśliŭ, što masavaja začystka etničnych turak na miažy Turcyi — nieprymalny varyjant dla tureckaha hramadstva.
«Rasieja faktyčna ŭvajšła ŭ asablivy pieradvajenny pieryjad: dypłamatyčnyja kantakty z Ankaroj zhortvajucca, mytnia spyniła afarmlać lubyja tureckija tavary, a Pucin papiaredziŭ rasijskich turystaŭ u Turcyi, što jany «mohuć padviarhacca značnaj niebiaśpieki», — praciahnuŭ Fielhienhauer.
Vajenny ekśpiert adznačyŭ, što ŭ Siryi razhortvajecca najnoŭšaja ZRK S-400, krejsier «Maskva» z ZRK «Fort» (Z-300F) staŭ na rejdzie Łatakii i rasijanie pryhrazili previentyŭna źbivać tureckija źniščalniki. Jon dadaŭ, što pieradavyja pazicyi siryjskaj apazicyi ŭ Łatakii znachodziacca ŭsiaho za 45 km ad vajskovaj bazy «Chmiejmim», na jakoj raźmieščana rasijskaja avijacyja, i radavoha hniazda Asadaŭ. Tamu Paŭnočnuju Łatakija sprabujuć začyścić. Tureckim uładam taksama niama kudy adstupać.
«U nas na bazie «Chmiejmim» usiaho dva źviany źniščalnikaŭ (Su-30sm i Su-27SM3) pa čatyry štuki ŭ kožnym. Pierakinuć dadatkova značnyja siły, majučy ŭsiaho adnu abstalavanuju bazu, ciažka, dyj niebiaśpiečna stvarać zanadta vialikuju kancentracyju sił u adnym ŭraźlivym punkcie. U turak: 179 F-16C (adnamiascovyja mašyny) i 57 F-16D (dvuchmiascovyja) — usie prasunutych madyfikacyj», — praciahnuŭ jon.
Ekśpiert adznačyŭ, što turecki fłot šmatkroć kolkasna i jakasna pieraŭzychodzić rasijskuju hrupoŭku ŭ Mižziemnym i ŭ Čornym morach.
«Kab dać rady najaŭnym rasijskim siłam u vypadku maštabnaha rehijanalnaha kanfliktu, turkam ŭ pryncypie nie patrebnyja ZŠA i inšaje NATA — sami mohuć spravicca, chaj i sa stratami. S-400 «Tryumf», viadoma, mahutnaja i sučasnaja sistema, ale joj patrebna stratehičnaja hłybinia, a ciapier jaje razharnuli biez surjoznaha suchaputnaha prykryćcia, zusim pobač z frontam. Tureckija tanki, kali jany ŭvojduć u Siryju i buduć nastupać pry padtrymcy apazicyi, mohuć prarvacca da bazy «Chmiejmim» za paru hadzin i voźmuć sistemu S-400 u jakaści trafieja», — upeŭnieny jon.
Ekśpiert dadaŭ, što choć Rasija i źjaŭlajecca jadziernaj dziaržavaj, u turkaŭ pobač ź siryjskaj miažoj na bazie Indžyrlik składziravana da 40 jadziernych bombaŭ B1 padvojnaha z ZŠA kluča na vypadak vajny z Rasijaj.
«Moža, varta źlohku prytarmazić, vyciahnuć turecki nož ź śpiny i pasprabavać niejak damovicca, nu nie dabivać choć by turkamanaŭ?» — padsumavaŭ jon.
